Convento de Varnhem
Coordenadas: 58°23′3″N 13°39′15″L / 58.38417, -13.65417
O Convento de Varnhem foi un convento na localidade sueca de Varnhem, na provincia de Västergötland.
Historia e características[editar | editar a fonte]
Foi fundado arredor de 1150 por monxes cistercienses procedentes do convento de Alvastra. Na súa igrexa soterráronse varios personaxes da historia de Suecia.
O convento foi favorecido con doazóns da dinastía de Erik. En 1234 incendiouse e reduciuse a cascallos. Por iniciativa de Birger Jarl e outros nobres que decidiron financialo, procedeuse á súa reconstrución.
Coa chegada da reforma protestante a Suecia, a propiedade do convento foi confiscada en 1527. O edificio foi incendiado polas tropas danesas en 1566 durante a Guerra Nórdica dos Sete Anos. O templo foi restaurado no século XVII por decisión de Magnus Gabriel De la Gardie, quen creou un mausoleo familiar alí. A igrexa volveu ser restaurada con especial coidado entre 1911 e 1923 e entre 1921 e 1929 fixéronse escavacións nas ruínas do convento, que se retomaron nos anos setenta.
Actualmente só permanece a igrexa, mentres que o resto do convento áchase en ruínas, mais aínda así, o sitio é un atractivo turístico.
Tumbas en Varnhem[editar | editar a fonte]
- Canuto I Eriksson, rei de Suecia de 1167 a 1196.
- Erik X Knutsson, rei de 1208 a 1216.
- Erik o Coxo, rei desde 1222 até 1250.
- Birger Jarl, fundador de Estocolmo, a súa esposa Matilde de Holstein e seu fillo Erik Birgersson.
- Magnus Gabriel De la Gardie, home de estado do século XVII.
