Constantino IX

Na Galipedia, a Wikipedia en galego.
Mosaico con Constantino IX, Xesús e a emperatriz Zoe

Constantino IX Monómaco (c. 1000 - 11 de xaneiro de 1055) reinou como emperador bizantino do 11 de xuño de 1042 ao 11 de xaneiro de 1055. Foi elixido por Zoe como marido e coemperador en 1042, aínda que se atopaba no exilio por conspirar contra o seu anterior marido Miguel IV. Gobernaron conxuntamente ata a morte de Zoe en 1050.

En 1043 relevou ao xeneral Xurxo Maniaces do seu mando militar en Italia, e en consecuencia Maniaces declarouse a si mesmo emperador. Cando as súas tropas estaban a piques de derrotar a Constantino nunha batalla, Maniaces foi ferido e morreu no campo de batalla, dando fin á crise. Xusto trala vitoria, Constantino foi atacado por unha flota dos Rus de Kiev, que seguramente fora contratada por Maniaces. Tamén esta flota foi derrotada grazas ao uso do lume grego.

En 1046, os bizantinos tiveron un primeiro contacto cos turcos selxúcidas. Loitaron nunha batalla en Armenia en 1048 e estableceron unha tregua para o ano seguinte. Con todo, en 1053 Constantino viuse obrigado a licenciar ás súas tropas armenias por razóns económicas, deixando a fronteira oriental do Imperio mal defendida.

En 1054 as diferenzas seculares entre a Igrexa ortodoxa grega e a Igrexa católica romana deron lugar á súa separación definitiva. Os legados do papa León IX excomungaron ao patriarca de Constantinopla Miguel Cerulario, ao non estar este de acordo coa adopción de certas prácticas eclesiais occidentais; e Cerulario replicou excomungando aos legados. Este feito anulou as posibilidades dunha alianza entre Constantino e o Papa contra os normandos do sur de Italia.

Constantino quixo intervir, pero enfermou e morreu o 11 de xaneiro do ano seguinte. Teodora, a filla maior de Constantino VIII, que xa reinara xunto coa súa irmá Zoe, foi nomeada emperatriz.

Constantino foi tamén o patrón do erudito Miguel Psello o Xove, cuxa Chronographia recolle a historia do reinado de Constantino e moitos anteriores.

O sobrenome de Constantino, Monómaco (o que loita as súas propias batallas) sería herdado polo seu neto, Vladimiro Monómaco.


Imperio Bizantino

Segue a:
Zoe Porfiroxénita
Constantino IX
Precede a:
Teodora Porfiroxénita
Dinastía Macedonia