Consello Federal de Suíza
 | Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo. (Desde xaneiro de 2021.) |
O Consello federal (en idioma alemán Der Bundesrat, en francés Le Conseil Fédéral, en italiano Il Consiglio Federale, e en romanche Il Cussegl Federal) é o órgano executivo de Suíza. Está formado por sete membros chamados conselleiros federais que son elixidos separadamente por un período de 4 anos con posibilidade de reelección. Tradicionalmente, un conselleiro federal é facilmente reelixido ata a súa dimisión. Os casos de non reelección son extremadamente raros (4). Ás veces estes prefiren renunciar se non están seguros de ser reelixidos. O Consello federal reúnese no parlamento suízo na capital do país en Berna
O Consello federal funciona co sistema de colexialidade, o que significa que todos os seus membros están « obrigados » a defender as opinións do Consello federal, ou sexa as decisións tomadas pola maioría no caso de desacordo. O presidente da Confederación ten a función de representante do país, porén, este non ten máis poder cós demais membros do consello; O presidente mailo seu sucesor, o vicepresidente, son escollidos pola Asemblea federal por un mandato dun ano, a tradición pide que os partidos se turnen e que os conselleiros máis antigos teñan a prioridade, é dicir que un conselleiro elixido este ano non pode ser presidente ata que os máis antigos do consello pasen polo menos unha vez pola presidencia.
De 1959 a 2003, a composición dos partidos no seo do consello federal non chegou a mudar nin unha soa vez, o que foi chamado a fórmula máxica. O 10 de decembro de 2003, a fórmula máxica foi modificada posto que a paisaxe política do país pedíao. O PDC debía ceder un posto á UDC. Foi entón cando a conselleira federal saínte Ruth Metzler-Arnold non foi reelixida; un mes antes de comezar o seu mandato presidencial, o que a colocaría como a segunda muller en subir á presidencia e a persoa máis nova en alcanzar a presidencia suíza (40 anos).
O chanceler da Confederación é a miúdo chamado "o oitavo conselleiro federal" e aparece na foto de familia do Consello de cada ano. O actual chanceler é Walter Thurnherr, que ocupa o cargo dende o 1 de xaneiro de 2016. As súas funcións equivalen ás dun secretario xeral dun goberno.
Actualmente atopamos no consello federal:
- Dous membros do Partido Socialista Suízo (PSS),
- Dous membros da Unión Democrática do Centro (UDC),
- Dous membros do Partido Liberal Radical Suízo (PLR).
- Un membro do Partido Democráta Cristián (PDC).
Composición actual e partidos políticos, por orde de antigüidade:
- Ueli Maurer (UDC).
- Simonetta Sommaruga (PSS).
- Alain Berset (PSS).
- Guy Parmelin (UDC).
- Ignazio Cassis (PLR).
- Viola Amherd (PDC).
- Karin Keller-Sutter (PLR).
