O Blue Monday (literalmente, «luns triste» en inglés) é un nome que se lle dá ao terceiro luns de xaneiro, partindo da consideración de ser o día máis triste do ano.[1][2] O nome difundiuse por primeira vez en 2005, como parte dunha campaña publicitaria de Sky Travel, desenvolvida pola empresa de comunicación Porter Novelli, dirixida a superar a caída de reservas que sufrira en 2004.[3] Nesa campaña, Sky Travel afirmaba que chegara a concluír esa data a través dunha ecuación.[2][4]
A data difundiuse nun comunicado de prensa asinado por Cliff Arnall, que daquela era profesor no Centre for Lifelong Learning, adscrito á Universidade de Cardiff. Ben Goldacre, columnista de The Guardian, descubriu que a axencia de relacións públicas Porter Novelli entregar o comunicado de prensa en que se describía a ecuación, xa escrito, a varios académicos, aos que lles ofreceu diñeiro por vincular os seus nomes a el.[1] Posteriormente The Guardian publicou unha declaración da Universidade de Cardiff na que se distanciaban de Arnall, apuntando que fora un antigo profesor a tempo parcial, que se retirara en febreiro de 2006.[5]
