Aimé Constant Fidèle Henry

Na Galipedia, a Wikipedia en galego.
Aimé Constant Fidèle Henry
Nacemento13 de xuño de 1801
Lugar de nacementoDouai
Falecemento23 de febreiro de 1875
Lugar de falecementoBonn
SoterradoCemiterio vello de Bonn
Nacionalidadealemá
Ocupaciónlitógrafo, libreiro, editor, botánico e naturalista
PaiCharles Albert Joseph Henry
NaiAnna Rebekka Mayer
CónxuxeMaria Anna Josepha Eiler
FillosJoseph
Carl Johann Hubert
Albert
PremiosMembro da Leopoldina
editar datos en Wikidata ]

Aimé Constant Fidèle Henry (tamén coñecido como Aimé Constantin Fidelius Henry), nado o 13 de xuño de 1801 en Douai (Francia), e finado o 23 de febreiro de 1875 en Bonn (Alemaña), foi un litógrafo, libreiro, editor, botánico e naturalista alemán de orixe franco-alemá que traballou en Bonn.

Traxectoria[editar | editar a fonte]

Aimé Henry era fillo dun membro do exército revolucionario francés, Charles Albert Joseph Henry, e de Anna Rebekka Mayer, que nacera en Düsseldorf. Aimé Henry chegou a Düsseldorf (Reino de Prusia) contra 1816 e formouse como litógrafo na Compañía Arnz & Winckelmann, que traballa na industria editorial desde 1817. Despois da súa formación e o posterior traballo para Arnz & Winckelmann, Aimé Henry fundou máis tarde o seu propio instituto litográfico o 24 de novembro de 1828, xunto con Maximilian Cohen en Bonn e, uns meses despois instalouse nunha tenda composta por un instituto litográfico, unha tenda de arte e unha tenda de materiais de escritura e debuxo. En 1833 a compañía recibiu o título de membro do Instituto litográfico da Rheinische Friedrich-Wilhelms-Universität de Bonn e, o 6 de maio de 1835, aínda que ningún dos dous socios comerciais era libreiro adestrado, concedéuselle a Henry a licenza de libreiro.

En 1842 Hemry casou con Maria Anna Josepha Eiler, coa qur tivo tres fillos, Joseph, Carl Johann Hubert e Albert.

O 31 de decembro de 1861, a compañía dividiuse, e Henry dirixiu a partir deste momento un instituto de libros, arte e litografía.

Henry tiña unha excelente reputación como litógrafo, e foi considerado un experto neste campo. Nos seus últimos anos Henry tamén traballou como bibliotecario na Academia alemá das ciencias naturais Leopoldina,[1] e en 1843 foi elixido membro desta douta institución.[2]

Xunto con Theodor Friedrich Ludwig Nees von Esenbeck, Philipp Wirtgen e Karl Wilhelm Arnoldi, Johann Carl Fuhlrott, Ludwig Clamor Marquart e outros, fundou a Asociación Botánica no Medio e Baixo Rin en 1834,[3] a posterior Asociación de Historia Natural da Renania e a Westfalia prusianas,[4] coas que revitalizaron significativamente a exploración botánica da Renania. Tamén foi membro da Sociedade de Científicos e Médicos alemáns.[5]

Na súa honra, Christian Gottfried Daniel Nees von Esenbeck nomeou o xénero Henrya da familia das acantáceas.

Henry faleceu en Bonn o 23 de febreiro de 1875, e foi enterrado no vello cemiterio desta cidade.

Abreviatura[editar | editar a fonte]

A abreviatura Henry emprégase para recoñecer a Aimé Constant Fidèle Henry como autoridade na descrición e taxonomía en botánica.

Notas[editar | editar a fonte]