Voo 980 de ALM

Voo 980 de ALM
DC-9 semellante ao do accidente
Resumo
Data	2 de maio de 1970
Causa	erro do piloto
Lugar	mar Caribe
Coordenadas
Orixe	Nova York-JFK
Destino	aeroporto Princesa Xuliana
Finados	23
Feridos	37
Aeronave
Tipo de aeronave	Douglas DC-9-33CF
Operador	ALM
Rexistro	N935F
Pasaxeiros	57
Tripulación	6
Superviventes	40

O voo 980 de ALM era un servizo regular entre o Aeroporto Internacional John F. Kennedy de Nova York e aeroporto Princesa Xuliana en Sint Maarten, Antillas Neerlandesas. O día 2 de maio de 1970, tras varios intentos de aterraxe sen éxito, o avión quedou sen combustible e realizou unha amaraxe de emerxencia no mar Caribe, a uns 48 km de St. Croix, con 23 mortes e 40 superviventes.

Avión e tripulación

O aparello era un bimotor Douglas DC-9-33CF operado en nome de ALM Antillean Airlines por Overseas National Airways (ONA), sendo o avión e a tripulación de voo de ONA e a tripulación de cabina de ALM. Estaba rexistrado nos Estados Unidos como N935F. O voo levaba 57 pasaxeiros e 6 tripulantes. A tripulación de voo estaba formada polo capitán de 37 anos Balsey DeWitt, o primeiro oficial de 25 Harry Evans II, e o navegador de 35 Hugh Hart. A tripulación de cabina estaba formada polo sobrecargo Wilford Spencer e os asistentes de voo Tobias "Tito" Cordeiro e Margaret Abraham.

Accidente

O voo 980 foi normal ata chegar ao Caribe. Despois de que fose autorizado a descender a 10 000 pés (3 000 m), o control de tráfico aéreo rexional (ATC) avisou de que o tempo en Sint Maarten estaba por debaixo dos mínimos para aterrar. O capitán elixiu desviarse a San Xoán, pero pouco despois a torre de Sint Maarten avisou o voo de que a meteoroloxía mellorara o suficiente como para poder aterrar. O avión realizou unha aproximación inicial a Sint Maarten, pero non foi capaz de ver a pista a tempo para aliñarse antes de aterrar e anunciou unha aproximación frustrada.

O voo 980 fixo despois un segundo intento de aterraxe, pero novamente sen éxito debido ao aliñamento coa pista. A tripulación fixo un terceiro intento, pero estaba demasiado alto para aterrar con seguridade. Despois de avaliar a situación do tempo e do combustible, a tripulación elixiu desviarse a St. Croix, e recibiu un vector e unha autorización. Nese momento a tripulación decatouse dunha posible discrepancia entre os indicadores de combustible e a cantidade que calcularan de combustible restante. O capitán avisou o ATC da súa intención de amarar e comezou unha aproximación baixa sobre a auga. O voo 980 amarou no mar Caribe ás 3:49 pm hora local.

Aínda que os pilotos acenderon os sinais para abrochar os cintos de seguridade antes da amaraxe, na cabina de pasaxeiros non se chegou a entender ben que o avión estaba a piques de tocar. Por conseguinte, un número descoñecido de pasaxeiros e tripulantes estaban de pé ou non tiñan abrochado o cinto cando o avión golpeou a auga.

O avión quedou relativamente intacto despois da amaraxe, pero afundiuse despois do accidente a unha profundidade duns 1 500 metros, sen que nunca fose recuperado. O accidente causou 23 mortes e deixou feridos 37 dos 40 superviventes. Os dous pilotos sobreviviron. A recuperación dos superviventes con helicópteros comezou unha hora e media despois da amaraxe, e o derradeiro en ser rescatado, o primeiro oficial, foi recollido unha hora despois.

Os esforzos de escate incluíron undades da Garda Costeira, da Armada e do Corpo de Marines estadounidenses, e varios superviventes foron rescatados por helicóptero.