Vicálvaro

Na Galipedia, a Wikipedia en galego.
Localización en Madrid.

Vicálvaro é unha antiga vila da provincia de Madrid que actualmente constitúe un distrito do leste da cidade de Madrid. Limita ao oeste co distrito de Moratalaz, ao norte co de San Blas, ao sur co de Vila de Vallecas e ao leste cos municipios de Coslada e Rivas-Vaciamadrid.

División administrativa[editar | editar a fonte]

Administrativamente, Vicalvaro está dividido en dous barrios: Casco Histórico de Vicálvaro e Ambroz. Con todo, a distribución urbanística do distrito fai que os susoditos barrios administrativos estean bastante dispersos, e cabe falar, no seu lugar, de tres grandes barrios:

  • Vicálvaro, que inclúe o casco antigo da antiga vila que foi Vicálvaro antes de incorporarse a Madrid, así como as zonas (coñecidas entre os vicalvareños co nome de poboados, colonias ou barrios) de San Juan, Mil Viviendas, Las Cruces e Anillo Verde.
  • Valdebernardo, construído fundamentalmente nos anos 90.
  • Valderrivas ou Valderribas, de máis recente creación, localizado nos terreos anteriormente ocupados pola fábrica de cemento do mesmo nome. Inclúe tamén a zona coñecida como La Catalana.

A estes tres grandes barrios, hai que sumar o polígono industrial de Vicálvaro, así como outros núcleos de poboación que, construídos sobre terreos pertencentes ao distrito, están máis próximos ao casco urbano doutros municipios que ao resto de zonas urbanas de Vicálvaro. Algúns destes núcleos fóronse incorporando aos devanditos municipios (Coslada e Rivas-Vaciamadrid) mercé á acordos entre o Concello de Madrid e os consistorios dos citados municipios.

Así mesmo, o distrito conta cunha enorme extensión de terreos sen urbanizar. Estes terreos, de natureza rústica ata 1989, foron declarados urbanizables no Plan Xeral de Ordenación Urbana aprobado no devandito ano. Actualmente, atópanse en distintas fases burocráticas previas á súa urbanización. Unha vez superados estes trámites, comezará a urbanización de catro novos barrios no distrito de Vicálvaro, que pasará así a ser un dos máis poboados da capital madrileña. Estes catro barrios son:

  • El Cañaveral: Obras iniciadas desde setembro de 2006. Estaba prevista a construción de 14.000 vivendas, a metade publicas, e espérase que estean finalizadas en 2010-2011
  • Los Berrocales: Obras iniciadas en xuño de 2007. Segundo as previsións, as primeiras vivendas deste novo barrio estarán terminadas en 2011, e o barrio completarase en 2017-2018.
  • Los Ahijones: Obras iniciadas en xullo de 2007. Desenvolverase aproximadamente un ano despois que Os Berrocales.
  • Los Cerros: Estanse dando os primeiros pasos cara á reconversión desta zona, actualmente agraria, en zona urbana, sen que existan de momento previsións fiables sobre cando comezará a urbanización dos terreos.

O desenvolvemento dos dous últimos barrios (Los Ahijones e Los Cerros) está actualmente paralizado, en cumprimento dunha sentenza do Tribunal Supremo que declarou inválida a declaración dos terreos que compoñen estes e outros novos barrios de Madrid como urbanizables. Estes terreos estaban considerados como de especial protección, polo que a sentenza considera ilegal a parte do Plan Xeral de Ordenación Urbana que transformou este solo en urbanizable.

Véxase tamén[editar | editar a fonte]

Ligazóns externas[editar | editar a fonte]