Narrador

Na Galipedia, a Wikipedia en galego.

Na vida cotidiá, un narrador é unha persoa que conta unha historia de forma oral ou escrita.

Na literatura, un narrador é un ser ficticio (pode ser un personaxe) que conta a historia nunha obra narrativa. A todo narrador correspóndelle un narratario. O resto deste artigo trata especialmente deste concepto.

O narrador é a instancia narrativa que regula a modalidade da información. Non podería haber relato se non houbese narración. O narrador non se identifica nin co autor real nin co ideal. Nin sequera o narrador-autor que aparece en tantas novelas é o autor real biograficamente caracterizado e individualizado, senón un tipo de narrador especial, unha invención -en verdade moi próxima a un álter ego- do autor ideal. Así pois, é o narrador, o que ás veces desde o relato dialoga co lector, quen recorre a enunciados metanarrativos, quen expresa reflexións, suxire relacións ou acontecementos.

Cando hai un narrador secundario no discurso denomínase paranarrador (un narrador conta que un paranarrador narra algo) . Ó paranarrador correspóndelle un paranarratario, aquel ó que o paranarrador lle conta a historia (un narrador conta a un narratario que un paranarrador narra algo a un paranarratario).


Este artigo tan só é un bosquexo
 Este artigo sobre literatura é, polo de agora, só un bosquexo. Traballa nel para axudar a contribuír a que a Galipedia mellore e medre.
 Existen igualmente outros artigos relacionados con este tema nos que tamén podes contribuír.