Eid al-Fitr

O Eid al-Fitr (en árabe: عيد الفطر, en persa: عید فطر, que significan Festa da ruptura do xaxún^[1]) é unha festividade relixiosa da tradición islámica. Significa a celebración do fin do Ramadán e abarca os tres primeiros días do Shawwal. A noite anterior ao primeiro día desta festa tamén se considera particularmente auspiciosa. Pola mañá pronto, a comunidade en conxunto realiza diferentes oracións e celebra un almorzo que marca o fin do xaxún do mes máis importante para o mundo musulmán.

Os musulmáns celebran esta festa estreando roupa nova. Os homes usan vestimenta branca como símbolo de pureza. O día enteiro é celebrado polos crentes visitando os fogares e comendo pratos especiais cociñados nesa ocasión. Todos sentan xuntos. Por tradición os nenos reciben regalos, as gratificacións e os doces entregados polos seus seres queridos como símbolo de amor. A fórmula para desexar unha feliz festa é "Eid Mubarak!", que significa "bendito Eid!" ou "santa festa!".

Sunna[editar | editar a fonte]

Denomínase sunna aos 13 requisitos que os musulmáns deben cumprir durante esta celebración. Formaban parte do costume do profeta Mahoma:

Vestir segundo a Xaria.
Bañarse.
Usar miswaak para a hixiene dental e oral.
Vestir o mellor que se teña.
Perfumarse o mellor posible.
Espertar á madrugada.
Ir o antes posible ao sitio onde se realice a pregaria do Eid.
Antes de ir débese comer algo doce, como dátiles.
Dar o sadaqatul fitr antes de ir.
Rezar a pregaria do Eid onde todos o fan. Non se pode rezar na casa, agás causas extremas comprobadas.
Logo de rezar débese volver á casa por un camiño diferente ao habitual.
Hai que ir a pé.
Recitar suavemente o Takbir de camiño ao lugar.