Wikipedia:Como comezar a colaborar

Na Galipedia, a Wikipedia en galego.
(Redirección desde «Wikipedia:CCC»)
Es novo na Wikipedia? Non sabes nin como nin por onde comezar? Pois por aquí, por exemplo!
Atallo:
WP:CCC

Se es novo e aínda non sabes que podes facer na Wikipedia e, o que é máis importante, como facelo, nesta páxina atoparás diversas ligazóns moi útiles para iniciarte no coñecemento básico do funcionamento da Wikipedia. Como descubrirás, non é necesario ser un grande experto en informática para editar aquí, abonda con coñecer pequenas cousas que coa práctica acaban por ser fáciles de reter e lembrar.

O primeiro que convén saber é que a Wikipedia é un wiki, o que significa que calquera pode editala e cambiar os seus contidos en calquera momento. O segundo, por ser un wiki, que é adecuado seguir unhas pautas básicas de edición para que o resultado sexa o mellor posible.

As seguintes dúas páxinas son verdadeiramente útiles para empezar a comprender todo isto. Bótalles unha ollada e logo volve aquí, que aínda hai máis!

Wikipedia:Introdución
Axuda:Introdución

Como xa liches antes, existen uns trucos para tratar o texto ao editares, a páxina que hai a continuación ofrece algúns consellos dos máis elementais, neste caso, para a redacción de bos contidos. Ademais, o seguilos é unha boa práctica en canto que se consegue unha maior unificación e homoxeneidade en todos os artigos.

Wikipedia:Libro de estilo

Vaites! Non marches aínda, agarda un momento! Neste lugar hai cinco normas básicas que todos debemos coñecer e que constitúen os chamados cinco piares da Wikipedia. Por suposto que existen máis ca estas regras, pero non é preciso que as saibas de memoria, volveríaste tolo! No canto disto, é recomendable a seguinte lectura, suficiente por hoxe:

Axuda:Introdución ás políticas

O bo que ten isto é que vas aprendendo aos poucos e sempre hai outra xente disposta a axudar. Por certo, se queres preguntar calquera cousa, se tes calquera dúbida e non sabes de o arranxar ti mesmo, deixa unha mensaxe na Taberna da Galipedia e axiña haberá alguén que cho poida solucionar.

Cómpre salientar que, como en todos os sitios, a Wikipedia desenvolveu unha xerga particular, e poida que algúns dos usuarios máis experimentados che falen con termos que non entendes. O glosario cos vocábulos máis comúns pode resolver a dúbida. Non obstante, pregunta se segues sen comprender, que ninguén traba aos novatos!

E finalmente, por fin, se xa te sentes con gana de comezar o choio, aquí tes unha morea de cousas pendentes agardando a seren resoltas:

  • O portal da comunidade ten propostas de colaboración e máis ligazóns. Proba a comezar algún dos artigos solicitados que alí aparecen. Se es un bo fotógrafo, podes axudar cargando algunhas imaxes solicitadas que se mostran tamén nesa páxina.
  • Tamén existen dúas listas con artigos que toda Wikipedia debería ter e que a Galipedia debería ter, onde hai algúns que non estaría mal crear, ampliar ou corrixir.
  • En temas de ampliación, os bosquexos están á espera de seren máis grandes, completos e mellores.
  • Ninguén é perfecto e todos cometemos erros de ortografía; as faltas ortográficas agóchanse ben e poden pasar desapercibidas á vista dalgúns: as túas achegas tamén poden ser gramaticais, proba a mellorar a redacción dos artigos.
  • Mágoa, as páxinas orfas non teñen ligazóns que apunten cara a elas e iso non é bo. É boa idea atopar páxinas relacionadas con elas e engadirlles ligazóns para que máis lectores as atopen. De igual xeito, as páxinas mortas non levan a ningunha outra, ponlles algunha ligazón a outros artigos da enciclopedia para facilitar o acceso.
  • Emprega as páxinas de conversa dos artigos para solicitar axuda se te atopas con que un artigo necesita unha revisión maior da que ti podes dar. Outro colaborador verá a nota nos cambios recentes e quizais el o poida mellorar nese aspecto.

As posibilidades son moitas, e cadaquén adoita especializarse na edición de páxinas en concreto ou nunha tarefa específica. Experimenta e descubre en que ámbito da Wikipedia te encontras máis cómodo e en que labor te divirtes máis. Lembra que o mellor é pasalo ben axudando ao espallamento da cultura en galego!


Frecha. Volver á páxina de axuda.