Voo 1285 de Arrow Air

Voo 1285 de Arrow Air
Restos do avión nun hangar en Gander.
Resumo
Data	12 de decembro de 1985
Causa	formación de xeo xunto cun cálculo errado de peso e velocidade (un informe menor apunta a un estoupido)
Lugar	Gander, Canadá
Coordenadas
Orixe	O Cairo
Derradeira escala	Gander
Destino	Fort Campbell, Kentucky
Finados	256 (todos)
Aeronave
Tipo de aeronave	McDonnell Douglas DC-8
Operador	Arrow Air
Rexistro	N950JW
Pasaxeiros	248
Tripulación	8
Superviventes	0

O voo 1285 de Arrow Air foi un avión McDonnell Douglas DC-8 operado nun voo chárter internacional que levaba tropas estadounidenses do Cairo á súa base en Fort Campbell, Kentucky, e facendo escalas en Colonia, Alemaña e Gander, Canadá.

Na mañá do xoves 12 de decembro de 1985, pouco despois de engalar en Gander de camiño a Fort Campbell, o avión entrou en perda, estrelouse e ardeu a media milla da pista de aterraxe matando os 248 pasaxeiros e 8 tripulantes a bordo. Trátase do accidente aéreo con máis mortos en chan canadense e o segundo peor dun DC-8, tras o accidente do voo 2120 de Nigeria Airways seis anos despois.

O accidente foi investigado pola Xunta Canadense de Seguridade (CASB) que determinou que a causa probable do mesmo foi a resistencia inesperadamente alta e redución de sustentacón, probablemente debido a contaminación por xeo nos bordos de ataque dianteiros e a superficie superior das ás, ademais dun peso subestimado do avión. Un informe menor afirmou que o accidente podería ter sido causado por un estoupido a bordo de orixe descoñecida antes do impacto.

Accidente

O avión, un McDonnell Douglas DC-8-63CF, fora fretado para transportar persoal do exército estadounidense, todos membos da 101ª División Aerotransportada, de volta á súa base en Fort Campbell, Kentucky. Os soldados completaran un despregue de seis meses no Sinaí, nunha misión da Forza Multinacional de Paz e Observadores. O DC-8 implicado no accidente, con rexistro N950JW, fora construído en 1969, e fora arrendado a Arrow Air pola súa compañía nai International Air Leases.

O voo fíxose en tres partes, con paradas para recargar en Colonia e Gander. O avión deixou O Cairo ás 20:35 UTC do mércores 11 de decembro de 1985, e chegou a Colonia o xoves 12 de decembro ás 01:21 UTC.

Antes de saír cara Gander ás 02:50 UTC embarcou unha nova tripulación formada polo capitán John Griffin, o primeiro oficial John Connelly e o enxeñeiro de voo Michael Fowler. O avión chegou ao aeroporto de Gander ás 09:04, onde os pasaxeiros saíron do aparello mentres era recargado. Testemuñas informaron que o enxeñeiro de voo realizou unha inspección externa da aeronave, despois da cal os pasaxeiros volveron subir.

O DC-8 comezou a súa carreira de engalaxe na pista 22 dende a intersección da pista 13 ás 10:15 UTC (06:45 NST). O avión rotou preto da pista de rodadura A, 51 segundos despois de soltar os freos, a unha velocidade duns 167 KIAS. Testemuñas informaron que o avión tivo dificultades para gañar altitude tras a rotación. Xa no aire o avión chegou aos 172 KIAS e comezou a decrecer novamente, causando que o DC-8 descendese. Tras cruzar a autoestrada Trans-Canada, situada a uns 270 metros do final da pista 22, a moi pouca altura, a inclinación da aeronave incrementouse e continuou descendendo.

Condutores na autoestrada dixeron que viron un resplandor brillante saíndo do avión antes de que se esnafrase xusto antes do lago Gander, a uns 1 100 metros do final da pista. O avión rompeu. golpeou un edificio baleiro e estoupou; isto iniciou un grave incendio debido á gran cantidade de combustible que o avión tiña para o voo. Os 248 pasaxeiros e 8 tripulantes morreron.