Vickers Vimy
| Vickers Vimy | |
|---|---|
 | |
| Tipo | bombardeiro pesado |
| Fabricante | Vickers Limited |
| Deseñado por | Rex Pierson |
| Primeiro voo | 30 de novembro de 1917 |
| Introducido | 1919 |
| Retirado | 1933 |
| Principais usuarios | Royal Air Force |
| Variantes | Vickers Vernon |
O Vickers Vimy foi un bombardeiro pesado británico desenvolvido e fabricado por Vickers Limited. Desenvolvido durante as derradeiras etapas da primeira guerra mundial para equipar á Royal Air Force (RAF), o Vimy foi deseñado por Reginald Kirshaw "Rex" Pierson, o deseñador xefe de Vickers.
Só un feixe de unidades entraran en servizo no momento do Armisticio do 11 de novembro de 1918, polo que o modelo non foi usado en operacións de combate activo durante o conflito. Pouco despois o Vimy converteuse no núcleo da forza de bombardeiros pesados da RAF durante os anos 20. O Vimy tivo éxito tanto na aviación militar como civil, sendo usado para o último propósito o modelo Vimy Commercial. Un derivado de transporte do Vimy, o Vickers Vernon, converteuse no primeiro avión de transporte dedicado a tropas en ser operado pola RAF.
Durante o período de entreguerras o Vimy estableceu varios destacados récords para voos de longa distancia; quizais o máis celebrado e significativo foi o primeiro cruzamento sen escalas do océano Atlántico, realizado por John Alcock e Arthur Brown en xuño de 1919. Outros fitos realizados polo Vimy foi voar dende o Reino Unido ata destinos como Suráfrica e Australia. O modelo continuou sendo operado ata os anos 30, tanto en servizos militares como civís.
