Under the Bushes Under the Stars é o noveno álbum de estudio da banda estadounidense de indie rockGuided by Voices, publicado o 26 de marzo de 1996 a través do selo Matador Records. Trátase do último disco ata o Let's Go Eat the Factory de 2012[1] en contar coa formación "clásica" que incluía a Tobin Sprout, Mitch Mitchell e Kevin Fennell, ademais do líder Robert Pollard. O álbum destaca por ser o primeiro intento de profesionalismo de Guided by Voices, sendo gravado en estudio en cintas de 24 pistas en vez de facelo en 4 pistas como acostumaban ata entón. As sesións de gravación foron arduas, pasando por catro estudios distintos con varios produtores e probando distintas configuracións antes de rematar o traballo.
As últimas seis cancións do CD non aparecen na contraportada do álbum. Eses temas, que foron incluídos como un EP de 12" por separado na edición en vinilo, non se incluíron orixinalmente na secuencia completa do álbum xa que se eliminaron das versións anteriores propostas do traballo, pero incluíronse a petición dos executivos do selo Matador que lamentaron a súa exclusión.
