The Dark Side of the Moon

Na Galipedia, a Wikipedia en galego.
The Dark Side of the Moon
Álbum de Pink Floyd
Publicado 1 de marzo de 1973
Gravación xuño de 1972 - xaneiro de 1973
Estudio(s) Abbey Road Studios, Londres
Duración 42:59
Xénero(s) rock progresivo
Selo(s) Harvest, Capitol
Producido por Pink Floyd
Cronoloxía
Obscured by Clouds The Dark Side of the Moon Wish You Were Here

The Dark Side of the Moon é o oitavo álbum da banda inglesa de rock progresivo Pink Floyd, publicado o 1 de marzo de 1973. Baseouse nas ideas exploradas en anteriores gravacións e en concertos, pero carece das estensas excursións instrumentais que caracterizaban aos seus traballos tras a saída en 1968 de Syd Barrett. Os temas de The Dark Side of the Moon inclúen conflito, codicia, paso do tempo e enfermidade mental, este último inspirado parcialmente na deterioración do estado mental de Barrett.

Desenvolvido durante actuacións ao vivo, unha primeira versión da suite foi estreada varios meses antes de que comezasen as gravacións no estudio; o novo material foi gravado en dúas sesións en 1972 e 1973 nos Abbey Road Studios de Londres. O grupo usou algunhas das técnicas máis avanzadas da época, como a gravación multipista e os loops de cinta. En varios temas destacan os sintetizadores analóxicos. O enxeñeiro Alan Parsons foi o responsable directo dalgúns dos aspectos sonoros máis destacables do disco, ademais do recrutamento do intérprete non-léxico Clare Torry. A icónica portada do álbum, deseñada por Storm Thorgerson, amosa un prisma que representa a iluminación da época da banda no escenario, os temas líricos do disco, e a petición do teclista Richard Wright dun deseño "sinxelo e audaz".

The Dark Side of the Moon foi un éxito inmediato, acadando o número 1 das listas de LPs e casetes da Billboard durante unha semana. Posteriormente estivo nas listas durante 741 semanas, dende 1973 ata 1988. Cuns 50 millóns de discos vendidos, é o maior éxito comercial de Pink Floyd, e un dos álbums máis vendidos do mundo. Foi remasterizado e reeditado dúas veces, e foi versionado na súa totalidade por distintos artistas. Do disco sacáronse dous sinxelos, "Money" e "[[Time (canción)|Time". Ademais do seu éxito comercial, The Dark Side of the Moon é un dos traballos máis populares de Pink Floyd entre os seareiros e os críticos, e é frecuentemente considerado como un dos mellores álbums da historia. O 22 de marzo de 2013, o disco entrou na Biblioteca do Congreso dos Estados Unidos, como parte do Rexistro Nacional de Gravacións, sendo cualificado de "culturalmente, historicamente e esteticamente significativo, e como un reflexo da vida nos Estados Unidos".

Listaxe de cancións[editar | editar a fonte]

Cara 1
N.º Título Escritor(es) Voces principais Duración
1. "Speak to Me"   Mason instrumental 1:30
2. "Breathe"   Waters, Gilmour, Wright Gilmour 2:43
3. "On the Run"   Gilmour, Waters instrumental 3:36
4. "Time" (inclue "Breathe (Reprise)") Mason, Waters, Wright, Gilmour    Gilmour, Wright 7:01
5. "The Great Gig in the Sky"   Wright, Clare Torry Torry 4:36
Cara 2
N.º Título Escritor(es) Voces principais Duración
1. "Money"   Waters Gilmour 6:22
2. "Us and Them"   Waters, Wright Gilmour, Wright 7:46
3. "Any Colour You Like"   Gilmour, Mason, Wright instrumental 3:25
4. "Brain Damage"   Waters Waters 3:48
5. "Eclipse"   Waters Waters 2:03