Sviataslaŭ Lohin

Sviataslaŭ Lohin
Biografía
Nacemento	26 de novembro de 1964 (60 anos); Chernihiv, Ucraína
Bispo ortodoxo
Datos persoais
Relixión	Cristianismo ortodoxo e Igrexa ortodoxa autocéfala belarusa
Educación	Kyiv Theological Seminary (en) (1994–1999); Instituto Politécnico de Kiev Igor Sikorsky (pt) (–1986); Universidade de Manitoba (pt)
Actividade
Ocupación	enxeñeiro (1986–), ministro
Premios
	Belarusian Democratic Republic 100th Jubilee Medal (en) ;

Este artigo amosa letras cirílicas. Sen o soporte axeitado, o texto pode mostrar símbolos sen sentido, coma caixas, marcas e outros.

Sviataslaŭ Lohin (en belaruso: Сьвятаслаў Логін), nado como Viačaslaŭ Viačaslavavič Lohin (en belaruso: Вячаслаў Вячаслававіч Логін) o 26 de novembro de 1964 en Chernihiv, é un eclesiástico belaruso, primado da Igrexa ortodoxa autocéfala belarusa dende o 11 de maio de 2008, e arcebispo de Navahrudak e América do Norte.

Traxectoria

Naceu o 26 de novembro de 1964 en Chernihiv (hoxe en Ucraína) de pais enxeñeiros, Viačaslaŭ Lohin e Liudmila Siz, orixinarios de Navahrudak (Belarús). Lohin graduouse polo Instituto Politécnico de Kíiv en 1986, e comezou a traballar como enxeñeiro.

En 1994 ingresou no Seminario de Kíiv até 1999, e posteriormente continuou os seus estudos relixiosos no Colexio de Santo André en Winnipeg, asociado á Universidade de Manitoba, até o ano 2000. O 27 de agosto dese ano foi ordenado diácono, e o 17 de decembro foi ordenado sacerdote da Igrexa ortodoxa autocéfala belarusa na igrexa de San Cirilo de Turaŭ de Toronto, e asignado á mesma parroquia.

Entre 2002 e 2007 foi reitor da parroquia da Santa Icona da Nai de Deus de Žyrovicy de Highland Park, en Nova Jersey, e a partir de 2005 tamén da catedral de San Cirilo de Turaŭ en Nova York. En outubro de 2006 foi elixido como candidato ao episcopado. En 2007 volveu ao seu primeiro destino en Toronto.

En febreiro de 2008 fixo votos monásticos e tomou o nome de Sviataslaŭ no mosteiro dos Catro Evanxelistas da Igrexa ortodoxa autocéfala ucraína nos Estados Unidos, en Houston (Texas). O 24 de febreiro de 2008 foi elevado ao rango de hegúmeno e arquimandrita. O 11 de maio de 2008 recibiu a consagración episcopal de mans dos bispos Oleksandr Bykovets e Makarios Carrion, da Igrexa ortodoxa autocéfala ucraína nos Estados Unidos, e de Paisii Dmokhovskyi, da Igrexa ortodoxa ucraína do patriarcado de Kíiv, como arcebispo de Navahrudak e América do Norte, e o sínodo da súa igrexa elixiuno administrador da mesma.