Spinnerette ficchou por Sire Records antes de que Dalle negociase a rescisión do contrato discográfico dicindo que non quería traballar "para xente á que lle importa unha merda a arte".[1] Inicialmente lanzou unha maqueta na súa páxina web chamada "Case of the Swirls".
O 8 de agosto de 2008 anunciouse no MySpace do grupo que os fans xa podían escoitar a primeira canción do próximo álbum a través do sitio web oficial. A canción chamábase "Valium Knights".[2] O 18 dese mesmo mes, Brody interpretou unha versión en directo de "Driving Song" con Queens of the Stone Age como banda de acompañamento para o concerto benéfico de Natasha Shneider.[3]
No mes de outobro de 2008 Dalle realizou varios concertos cunha banda de apoio formada por Tony Bevilacqua, Nicole Fiorentino (Veruca Salt), Bryan Tulao e Dave Hidalgo Jr (Suicidal Tendencies).[4]
Dalle declarou nunha entrevista que habería unha formación diferente cando fixese unha xira para un álbum. "Spinnerette non é unha banda, son eu e os músicos cos que queira traballar nese momento". Máis tarde aclarou que se refería á banda de xira e non aos músicos de estudio.[5]
Spinnerette lanzou un EP dixital, Ghetto Love, a través do seu sitio web oficial o 11 de decembro de 2008. O álbum de estrea da banda, Spinnerette, foi lanzado o 23 de xuño de 2009 a través de Anthem/Hassle Records.
O 27 de maio de 2009, publicouse o seguinte na páxina web da banda: "Estamos moi emocionados de anunciar que este ano formaremos parte do cartel dos festivais de Leeds e Reading. Spinnerette tocará o 28 de agosto en Leeds e o 29 de agosto en Reading, o mesmo día que os nosos amigos Arctic Monkeys e Eagles of Death Metal". Durante ese ano o grupo estivo de xira con bandas como Little Fish, Band of Skulls e Fun Loving Criminals, entre outras.[6]
En 2010, a banda gañou o premio ao Mellor Álbum Pop/Rock nos Premios de Música Independente polo seu álbum Spinnerette.[7]
Dalle deixou de usar o alcume de Spinnerette en 2010; en 2012, Dalle publicou na súa conta de Twitter que estaba gravando no estudio e que estaba traballando con Shirley Manson de Garbage en polo menos unha canción.[8] Dalle lanzou o seu primeiro álbum en solitario, Diploid Love, en 2014.[9]
