Os Ofidiformes (Ophidiiformes) son unha orde de peixes teleósteos, dentro da superorde Paracantopterixios (Paracanthopterygii). A orde inclúe especies mariñas, algunhas de augas profundas, como o peixe de hábitat máis profundo que se coñece, Abyssobrotula galatheae, atopado a 8.370 m na Foxa de Porto Rico.
As aletas pelvianas, cando están presentes, insírense ó nivel do preopérculo ou mesmo por diante, e ás veces presentan unha espiña nelas. As aletas dorsal e anal son longas, achegándose á caudal e, usualmente, unidas a esta.
