Matías López López

Na Galipedia, a Wikipedia en galego.
Saltar ata a navegación Saltar á procura
Matías López López
Retrato de Matías López.jpg
Nome completoMatías López López
Nacemento17 de maio de 1825
Lugar de nacementoSarria
Falecemento18 de xuño de 1891
Lugar de falecementoMadrid
NacionalidadeEspaña
OcupaciónEmpresario e político
CónxuxeAndrea de Andrés Sánchez primeira Marquesa de Casa-López
FillosAsunción, Rosa, Matías, Pablo e Mª del Carmen
Coñecido porFundador da fábrica de chocolates Matías López
Firmasen 1631.jpg
editar datos en Wikidata ]

Matías López López, nado en Santa Mariña de Sarria, o 17 de maio de 1825 e finado en Madrid o 18 de xuño de 1891, foi un político e industrial galego, benefactor do concello de Sarria.

Traxectoria[editar | editar a fonte]

Primeiros anos[editar | editar a fonte]

Industrial chocolateiro en Madrid, político e filántropo sarriao, foi o membro máis destacado da familia dos "Moreno" de longo asentamento na vila de Sarria. Matías López López, fillo e neto de labregos pobres, naceu na casa paterna que na fronteira á rúa ten unha lápida que di: "El Ayuntamiento de Sarria al Excmo. Sr. D. Matías López López. Benefactor e insigne hijo de esta villa. Nació en esta casa el 17 de mayo de 1825". É unha das máis humildes e reducidas casas da Sarria histórica, e no catastro de Ensenada (1753) aparece sendo titular dela unha María López.

Actividade empresarial[editar | editar a fonte]

Emigrado a Madrid en 1840, montou unha factoría para a elaboración de chocolate e produtos de pastelería.

Artigo principal: Chocolates Matías López.

Alcanzou o máis grande suceso económico e postos de relevancia na política e no mundo empresarial, sendo destacado promotor do asociacionismo derredor da Cámara de Comercio madrileña.

Política[editar | editar a fonte]

Foi deputado polo distrito de Sarria (1872-1873 e 1876-1879), senador pola provincia de Lugo (1877) e designado senador vitalicio en 1883. O seu sobriño Venancio Vázquez López fixo fortuna en Madrid e tamén participou na vida política da capital do Estado, sendo teniente alcalde de Madrid[1].

Vida persoal[editar | editar a fonte]

Formou familia en Madrid, casou con Andrea Andrés Sánchez, e alí, e no Escorial, naceron e morreron os seus fillos, sobrevivindo as fillas Rosa, Carme e Asunción, das que quedou unha numerosa descendencia.

Após a súa morte, a súa viúva, Andrea Andrés Sánchez, obtivo da Santa Sede o título de Marquesa de Casa López.

Filantropía[editar | editar a fonte]

En cumprimento de disposición testamentaria de Matías López, con cargo á súa testamentaría edificouse o edificio das Escolas Públicas de Sarria[2], grazas ao legado de 110.000 pesetas[3], segundo proxecto redactado por Luís Bellido. O construtor foi José Rivas Novoa, veciño de Lugo. As escolas, dotadas con moderno material, foron proba do cariño que Matías López tivo con Sarria, a onde se desprazaba con moita frecuencia malia a dificultade das comunicacións con Madrid, tendo todo xénero de deferencias para coa súa terra natal.

Sarria 0022.jpg

En 1878 o concello, dado que o reloxo de Santa Mariña estaba inservible, prégalle a Matías López que adquira un en Madrid, ao que accede en 1885, dando 500 pta. e ofrecendo máis se fixesen falla, para algunhas medidas excepcionais por mor da epidemia de cólera. No ano 1886 o concello acordou obsequiar a Matías López cunha serenata, no mes de agosto, por xoves afeccionados. En 1888 acordan darlle o nome de rúa Matías López ó treito comprendido entre as casas de Juan Puga e a de Bernardo Rodríguez Romay, pasando pola igrexa de Sta. Mariña[4], para as que Matías López doou as vidreiras[3], "xa que mirou ó pobo sempre con cariño e predilección, interesándose pola súa grandeza e distinguíndoo con algún donativo". Matías López paga os letreiros das rúas e acordan darlle outra serenata.

En 1890 dirixiu carta sobre supresión de Xulgados. Diríxense a este e ó Conde Pallares, Manuel Becerra, Benigno Quiroga e L. Ballesteros para xestionar e non se suprima o de Sarria[Cómpre referencia].

A súa viúva impulsou o Hospital Municipal Campo de Outeiro, inaugurado en 1909[5].

Homenaxes[editar | editar a fonte]

  • Gran Cruz de Isabel la Católica
  • Encomienda de Isabel la Católica
  • Legion d’Honneur
  • Unha das rúas principais de Sarria leva o seu nome[6]

Notas[editar | editar a fonte]

  1. "El sarriano que resucitó un pueblo". Bitácora de Cora; Galiciae.com (en castelán). Consultado o 2022-07-01. 
  2. "O mecenas Matías López". La Voz de Galicia (en castelán). 2004-10-30. Consultado o 2022-07-01. 
  3. 3,0 3,1 "O mecenas Matías López". La Voz de Galicia. 2004-10-30. Consultado o 2022-07-01. 
  4. "SANTA MARIÑA (SARRIA) – Badaladas.gal". Consultado o 2022-07-01. 
  5. "Sarria". www.caminofrances.org (en castelán). Consultado o 2022-07-01. 
  6. "A rúa Matías López foi das que deu orixe á Sarria moderna". La Voz de Galicia (en castelán). 2007-07-29. Consultado o 2022-07-01. 

Véxase tamén[editar | editar a fonte]

Ligazóns externas[editar | editar a fonte]