JoJo's Bizarre Adventure

Na Galipedia, a Wikipedia en galego.
Saltar ata a navegación Saltar á procura
JoJo's Bizarre Adventure
{{{caption}}}
ジョジョの奇妙な冒険
(JoJo no Kimyō na Bōken)
Manga
Creado por Hirohiko Araki
Editor Shūeisha
Publicado en Shōnen Jump (1984-2004)

Ultra Jump (2004-presente)

Primeira edición 1 de xaneiro de 1987
Última edición En publicación
Núm. de volumes 125

JoJo's Bizarre adventure (ジョジョの奇妙な冒険 JoJo no Kimyō na Bōken, lit. A estraña aventura de JoJo) é unha serie de banda deseñada xaponesa, manga, escrita e ilustrada por Hirohiko Araki, cuxa publicación comezou en 1987. Actualmente, JoJo's Bizarre Adventure consta dun total de 121 volumes tankōbon, pero aínda segue en publicación. Posteriormente, a historia sería adaptada a sucesivas edicións de anime, que aínda segue en emisión. Encádrase entre os xéneros de shōnen e seinen.

Argumento[editar | editar a fonte]

Conta a historia da familia Joestar e dos seus descendentes, que serán identificados cunha marca de nacemento nas costas en forma de estrela. O nome da serie fai referencia ao alcume que reciben todos os protagonistas das distintas temporadas, xa sexa coma resultado de xuntar a primeira sílaba dos seus nomes coa primeira dos seus apelidos, (Jonathan Joestar, Giorno Giovanna...) ou doutras variantes, coma no caso de Kujo Jotaro, ao que chaman Jojo pola repetición da sílaba "jo" (ジョ) dúas veces seguidas no seu nome.

A trama xirará en torno ao deber da familia de afrontar perigos paranormais usando uns poderes que cada un deles ten. Divídese, polo momento, nas seguintes partes:

  1. Phantom Blood (ファントムブラッド Fantomu Buraddo): Correspondente a os volumes 1-5, adaptada por David Production ao formato de anime de 9 episodios. Ambiéntase na Gran Bretaña de finais do século XIX. Jonathan Joestar, fillo da rica casa dos Joestar ve ameazada a vida do seu pai por Dio Brando, que fora adoptado coma a un fillo, pero que agora só desexaba converterse no dono de toda a fortuna da familia Joestar, aínda que para iso tivese que asasinar aos que se opuxeran ao seu camiño. Jonathan desvela unha conspiración deste para envelenar ao seu pai, pero fuxe da xustiza usando unha máscara de pedra enfeitizada que o converte en vampiro. A partir de aquí a historia consistirá na persecución de Dio por parte de Jonathan Joestar para evitar que a súa maldade poña en perigo ao mundo. Para lograr vencelo aprenderá a utilizar o sendo, arte marcial baseada no control das ondas de Hamón, ademais de recibir a axuda do mestre italiano de Hamón Zeppeli e o antigo criminal Speedwagon.
  2. Battle Tendency (戦闘潮流 Sentō Chōryū): Correspondente aos volumes 5-12, adaptada por David Production ao anime, que conta con 17 episodios. Na Nova York de 1938, Joseph Joestar, neto de Jonathan Joestar, vese envolto nun escenario de tensións froito dunha investigación levada a cabo pola Fundación Speedwagon sobre a máscara de pedra enfeitizada da anterior parte. Descubriuse que esta, en realidade, non era máis ca unha peza dun enorme arsenal de máscaras vampirizantes agochadas nun antigo templo de México. Os seus creadores durmían petrificados en piares de pedra, ata que nese ano espertaron do seu sono para dominar o mundo cos seus poderes sobrenaturais. Na aventura veranse involucrados tamén os científicos nazis no contexto da Segunda Guerra Mundial. Jonathan Joestar deberá evitar que estas antigas criaturas acordadas se fagan coa Pedra Vermella de Aja, coa que serían practicamente invencíbeis, sendo axudado por Caesar Zeppeli e Lisa Lisa, cos que aprenderá a controlar o hamón.
  3. Stardust Crusaders (スターダストクルセイダース Sutādasuto Kuruseidāsu): Correspondente aos volumes 12-28, coa súa propia adaptación en forma de 13 OVA's e a de David Production de 48 episodios, sendo esta última máis fel ao manga. A filla do xa maior Joseph Joestar residía en Xapón, onde tivo un fillo chamado Kujo Jotaro, que se queixaba de ser acosado por unha especie de espírito. O seu avó Joseph acudiu en 1989 onda el para explicarlle que o que chamaba "espírito maligno" era en realidade un don denominado "stand". Faloulle de como Dio, gran inimigo do finado Jonathan Joestar, rexurdía das tebras para volver tentar facerse co mundo e matar aos descendentes dos Joestar. Coa axuda de Avdol, Kakyoin, Polnareff e, máis adiante, tamén do can Iggy, avó e neto irán na procura de Dio para acabar con el e, sobre todo, salvar á nai de Jotaro, que agonizaba ao bordo da morte por un maleficio lanzado polo inimigo. As personaxes principais, así coma os distintos matóns que Dio mandará na súa persecución ou Dio mesmo, terán os seus propios stands.
  4. Diamond is Unbreakable (ダイヤモンドは砕けない Daiyamondo wa Kudakenai): Correspondente aos volumes 29-47, adaptada por David Production en 39 episodios de anime. En 1999 un adulto Kujo Jotaro viaxa á cidade ficticia de Morioh en busca de Josuke Higashikata (仗助) (onde a sílaba "suke" (助) pode lerse tamén coma "jo"), fillo dunha aventura amorosa do xa ancián Joseph Joestar, para resolver con el uns asuntos sobre a súa futura herdanza. Porén, uns estraños fenómenos reportados pola Fundación Speedwagon obrígano a ficar na cidade. Aparecían cada vez máis usuarios de stand pola presenza dun arco que outorgaba ese poder a quen eran disparados cunha Frecha máxica, moitos deles belicosos e dispostos a cometer maldades. Josuke, que tamén era usuario de stand, vese envolto na busca do arco e a frecha, sendo posteriormente axudado polos tamén usuarios Okuyasu, Rohan e Koichi. Un dos stands xerados pola Frecha, o de Yoshikage Kira, será tan poderoso que a súa persecución constituirá un dos grandes problemas desta parte.
  5. Golden Wind (黄金の風 Ōgon no Kaze): Correspondente aos volumes 47-64, do que actualmente David Production está elaborando unha adaptación ao anime que contará con 39 episodios. A trama desta parte constrúese sobre o poder da Frecha para crear stands Requiem, nados cando esta impacta cun stand normal, en lugar de co seu dono. Estes stand Requiem contarán con poderes mellorados respecto dos anteriores. O protagonista será Giorno Giovanna, fillo do vampiro Dio que, a diferenza do seu pai, quererá darlle algo bo ao mundo. Moverase en torno ás mafias da Italia de 2001 para se converter nun "Gang Star", facéndose xefe dunha destas e repartindo as súas riquezas entre os necesitados. Por iso se une á mafia Passione, formada polos usuarios de stand Bruno Bucciarati, o ex-policía Leone Abbacchio, Guido Mista, Narancia Ghirga e Pannacotta Fugo. Encomendaráselles unha misión: protexer a Trish Una, a moza filla do capo de Passione, dos usuarios de stand dunha familia inimiga.
  6. Stone Ocean (ストーンオーシャン Sutōn Ōshan): Correspondente aos volumes 64-80. En 2011, Florida, a filla de Kujo Jotaro, Jolyne Cujoh é acusada en falso de asasinato e levada a prisión por un complot organizado por un discípulo de Dio para refacer o mundo á imaxe e semellanza do seu mestre. Sendo atrapado seu pai, verase obrigada a servirse do seu recentemente liberado stand para salvalo e acabar co discípulo de Dio, Enrico Pucci, servíndose da axuda de amigos coma Ermes Costello, Weather Report, Narciso Anasui, Foo Figthers ou Emporio Alniño.
  7. Steel Ball Run (スティール・ボール・ラン Sutīru Bōru Ran): Corresponde aos volumes 81-104. Acontece nun universo alternativo onde, a finais do século XIX Gyro Zeppeli e Johny Joestar perseguen desbaratar os plans do presidente Funny Valentine, que quería xuntar todas as partes dun vello Santo que outorgaba poderes de stand. Para elo serviranse do spin ou "rotación", contraposición do Hamon neste universo paralelo, e deberán combater a Diego Dio Brando.
  8. Jojolion (ジョジョリオン Jojorion): Atópase actualmente en publicación e comeza co volume 105. Continúa no universo paralelo iniciado na parte anterior. En 2012 a cidade de Morioh é arrasada por tsunamis e terremotos. Tras disto, unhas estruturas chamadas Muros de Ollos ameazan aos habitantes. Un mozo con amnesia, que será chamado Josuke e adoptará a familia Higashikata, deberá combater estas estruturas. Introducirase unha nova vía para obter stands: interactuando cos Muros de Ollos. Ao tempo que a aventura se desenvolve, enxérgase como os pais de Josuke parecen saber moito máis sobre o mozo do que parece e sobre os misterios de Morioh, chegando a insinuarse nalgúns fragmentos da historia unha posible conexión no futuro entre os dous universos alternativos da serie.

Véxase tamén[editar | editar a fonte]