Igrexa de San Xoán de Vilanova

Igrexa de San Xoán de Vilanova
Vilanova
Instancia de igrexa
Estilo arquitectura románica
Persoas e organizacións
Diocese arquidiocese de Santiago de Compostela
Dedicado a Xoán o Bautista
Localización  Situado en Vilanova, Miño, provincia da Coruña, Galicia, España Mapa  43°22′37″N 8°12′07″O
Fontes e ligazóns
Wikidata C:Commons

A igrexa de San Xoán de Vilanova é un templo relixioso de estilo románico da parroquia de Vilanova, no concello coruñés de Miño. A construción desta igrexa a mediados do século XI (1040) é un decidido paso adiante na introdución do románico en Galiza.

Historia

Só se coñecen referencias documentais, de tipo económico, moi serodias, por exemplo o escrito polo cardeal Jerónimo del Hoyo en 1607.^{[Cómpre referencia]}

Descrición

Na igrexa pode distinguirse a fasquía do románico lombardo, en contraste co hexemónico borgoñón e compartida coa Basílica de San Martiño de Mondoñedo e a Igrexa de Santo Antoniño de Toques. A súa cabeceira remata en semicírculo, importante novidade xa que é a primeira ábsida do románico galego con esa planta^{[Cómpre referencia]} e, probabelmente, contemporánea das capelas absidais de San Xoán e San Pedro na catedral compostelá. Coma nestas, a cabeceira de Vilanova cóbrese con bóveda de cuarto de esfera, ou de forno, apeada no muro a través dunha sinxela imposta, coma o arco que enlaza coa nave. Esta cóbrese con teitume de madeira a dúas augas.

Aos lados do tambor da ábsida ábrense dúas pequenas xanelas con derramamento cara ao exterior e ao interior (moi habitual nas primeiras igrexas románicas galegas, bardante a catedral de Santiago de Compostela). Na parte alta dos muros laterais da nave trazáronse tres vans en cada un, dos que fican abertos os do sur, xa que o norte se reestruturou e, no medio, abriuse unha porta.