Henge

Na Galipedia, a Wikipedia en galego.
Tres "henges", círculos concéntricos, en liña. Henges de Thornborough en Masham, North Yorkshire, Inglaterra.

Henge é un tipo de construción neolítica consistente en movementos de terra en forma de recinto circular peraltado cunha canle interna. O termo henge foi empregado por primeira vez en 1932 por Thomas Kendrick tomando a raíz do topónimo Stonehenge, e que procede do inglés antigo heng, que significa "suspenso" ou "pendurado".[1][2]

Existen tres tipos de henges:

  • Henge: duns 20 a 300 m de diámetro. Adoitan ter pequenas evidencias de ocupación no interior e estruturas rituais como círculos de pedra.
  • Mini henge: de 5 a 20 m de diámetro. Tamén chamados monumento hengiforme ou henge de Dorchester.
  • Super henge ou recinto-henge (henge enclosure en inglés) presentan mostras de ocupación e adoitan ter máis de 300 m de diámetro.

Os henges son estruturas propias das illas británicas. Porén, en Roda (Barreiros) localizouse en 2006 un círculo lítico duns 50 metros de diámetro durante a construción da Autovía do Cantábrico, os restos dunha construción henge duns 3700 anos de antigüidade[3][4]. Esta construción consta dun foxo exterior de entre tres e catro metros de diámetro e un metro de profundidade. O círculo está formado por dous muros, entre os cales se depositou terra do foxo, formando así o parapeto. Tería no punto máis alto probablemente os tres metros. Consérvase a zona de entrada, de entre metro e medio e dous metros, orientada ao noroeste. Xunto á entrada hai unha pedra que podería ser un dos menhires que delimitaban o acceso. Outro henge podería estar en Coeses (Lugo), aínda sen estudar.

Notas[editar | editar a fonte]

  1. "Henge". Dictionary.com (en inglés). Consultado o 6 de agosto de 2015. 
  2. Rothwell, Henry. "Henges – or the archaeology of etymology (or vice versa); The man who gave us the word". Digital digging (en inglés). Consultado o 6 de agosto de 2015. 
  3. [1], artigo de José Alonso en La Voz de Galicia, 22 de xaneiro de 2016 (en castelán).
  4. "A Roda, el Stonehenge gallego", artigo de José Alonso en La Voz de Galicia, 1 de agosto de 2015 (en castelán).