Estanque da Gruta
Coordenadas: 43°16′40″N 8°13′10″O / 43.277738532748, -8.219504853283
O Estanque da Gruta é unha extensión de auga de orixe artificial situada no Parque do Pasatempo, na vila de Betanzos, que forma parte do conxunto da Gruta da Recoleta.
Características[editar | editar a fonte]
O estanque, situado baixo a Gruta da Recoleta, conta con dúas zonas diferenciadas por unha pequena ponte. Por un lado a do relevo da suposta Boca de Hades, que permite entrever o interior das covas deste primeiro nivel; e un segundo conformado con relevos de animais (oso polar, rinoceronte, hipopótamo, dromedario...). Nesta segunda parte, pegado ás escaleiras que permiten descender ata el, atopamos un par de zocas e o relevo do nome do lugar "Estanque de la Gruta".
O propio estanque contaba con saltos de auga similares aos do Estanque do Retiro, para facilitar o acceso pola boca do animal mariño -ou Boca de Hades ou do Inferno- que permitiría o acceso ás grotas desta terraza.
Nos bordes do Estanque da Gruta tamén atopamos a palabra PASATIEMPO creada con cantos rodados e o número 1893, en referencia ao suposto inicio das obras do parque, creado con pletinas metálicas.
Simboloxía[editar | editar a fonte]
Nesta parte do Pasatempo podemos apreciar dúas das características principais do xardín: a mestura da visión pedagóxica e enciclopédica do parque, cos relevos dos animais, e a visión iniciática do Pasatempo, pois a propia Boca do Inferno funcionaría como inicio desa viaxe transfomadora que comeza ao entrar pola boca do animal mariño, á semellanza do que acontece na Biblia con Jonás, para sair posteriormente na seguinte terraza do Pasatempo.
Derrubamento[editar | editar a fonte]
En febreiro de 2017 desprendéronse uns seis metros do mural do estanque na parte que dá ao exterior do recinto, o que obrigou a curtar o paso polo lugar, xa que o derrubo afectou ás lousas do paso peonil. A causa do desprendemento serían as filtracións de auga ao muro de cachotaría, aínda que se sinalou que o derrubo non supuña un dano irreparable grazas á catalogación realizada por arquitectos e especialistas en restauración como Xan Casabella, Xosé Díaz Vieites, Mari Carmen Pérez, Marcelo Aguirre e José Crespí, o que faría posible a reprodución detallada do muro. O daquela concelleiro de obras de Betanzos, Antonio Vázquez, deu prioridade á recuperación e saneamento do estanque, así como da consolidación do terreo, deixando a parte estética pendente.[1]
Notas[editar | editar a fonte]
- ↑ Vázquez, Dolores; Silva, Toni (16 de febreiro de 2017). "El Pasatiempo pierde seis metros del mural del estanque". La Voz de Galicia (en castelán). Consultado o 11 de xullo de 2024.
Véxase tamén[editar | editar a fonte]
Bibliografía[editar | editar a fonte]
- Cabaano Vázquez, Ignacio; Pato Iglesias, Mª Luz; Soussa Jiménez, Xosé (1992). «El Pasatiempo». O capricho dun indiano (2ª ed.). O Castro, Sada: Edicións do Castro. ISBN 84-7492-509-6.
- Arcay Barral, Ángel; DUO SUÁREZ, Yosune; SOUTO SANTÉ, José (2020). El Parque del Pasatiempo de Betanzos. Betanzos. ISBN 9788409260812.
- Arcay Barral, Ángel (2019). "Que é o Parque do Pasatempo? Arte, capricho e iniciación". Anuario Brigantino (42): 319–368. ISSN 1130-7625.