Cuspirei sobre as vosas tumbas

Na Galipedia, a Wikipedia en galego.
Cuspirei sobre as vosas tumbas
Título orixinal J'irai cracher sur vos tombes
Autor Boris Vian
Tradutor David Gippini
Ilustrador Jean Boullet
País Francia
Lingua francés
Xénero(s) Novela
Editorial Faktoría K de libros
Data de pub. 1946 (2007 en galego)
Páxinas 145 páx.
ISBN ISBN 978-84-96957-08-04


Cuspirei sobre as vosas tumbas (en francés J'irai cracher sur vos tombes) é unha novela do polifacético escritor francés Boris Vian, publicada baixo o pseudónimo de "Vernon Sullivan" en 1946 e ilustrada posteriormente por Jean Boullet en 1947.

Foi editada en lingua galega en 2007 por Faktoría K de libros, traducida por David Gippini.

Trama[editar | editar a fonte]

Aviso: Esta sección pode revelar detalles da trama e/ou do argumento.

A historia, como as demais escritas por Vian baixo o pseudónimo de Sullivan, desenvólvese no sur dos Estados Unidos, e pon en escena as dificultades dos afroamericanos na súa vida cotiá no trato cos brancos. Neste caso, Lee Anderson, un home negro pero de pel branca, deixa a súa vila natal trala morte do seu irmán, linchado e colgado por namorar dunha muller branca. Cando chega a outra vila, Lee faise dependente nunha tenda de libros e entra a formar parte da cuadrilla local de mozos sedentos de alcohol e sexo. O seu desexo secreto, porén, é vingar a morte do seu irmán.

En canto ó seu estilo, esta obra é a máis violenta das escritas por Boris Vian, a máis crúa e a máis representativa da serie de "Sullivan", na que Vian se propuxo denunciar o racismo e as condicións precarias dos negros nos estados sureños dos Estados Unidos. Pouco despois da súa aparición, en 1949, o libro foi prohibido por consideralo pornográfico e inmoral, e o seu autor foi condenado por aldraxe ós mortos. Tamén se publicou unha versión "edulcorada" do libro.