CIFP Universidade Laboral
| CIFP Universidade Laboral | |
|---|---|
 | |
| Enderezo | |
| Acea de Ama (O Burgo, Culleredo) | |
| Datas | |
| Inauguración | 1964 |
| Educación | |
| Xestión | |
| Tipo | Público |
| Na rede | |
| http://www.edu.xunta.gal/centros/iesuniversidadelaboralcoruna/ | |
O CIFP Universidade Laboral é un centro de ensino secundario non obrigatorio do concello de Culleredo, situado en Acea de Ama.
Historia
[editar | editar a fonte]Ten a súa orixe na construción en xullo de 1962 da Universidade Laboral para as profesións marítimo-pesqueiras, dentro do I Plan de Desenvolvemento Económico e Social 1964-1967. Unha gran praza de acceso dá entrada ás instalacións da Universidade Laboral, de 3500 m², nun extremo da cal se ergue un mastro de navío de 38 metros de altura.
O conxunto harmonízase dende unha idea de funcionalidade do espazo, o que se concreta nunha serie de edificacións intercomunicadas a través de galerías cubertas dando lugar a un Centro singular nunha contorna única. Foi proxectada polos arquitectos José López Zanón e Luís Laorga Gutiérrez e foi elixida polo Colexio de Arquitectos da Coruña, no día Mundial da Arquitectura (edición 2001) como exemplo da “recuperación da modernidade arquitectónica no noso país nos anos 60".
A andaina do centro iníciase en outubro de 1964 co nome de Universidade Laboral “Crucero Baleares”, con dependencia do Ministerio de Traballo e subvencionado polas Mutualidades Laborais. A orientación profesional preferente era Marítimo-pesqueira, e a procedencia do alumnado, que abarcaba toda España, e a súa condición de bolseiros en réxime de internado, implicou a construción dun internado, ademais das aulas e talleres e dun importante complexo deportivo.
Cos anos seguintes viñeron sucesivas mudanzas que irán configurando a súa identidade: primeiro foi adscrito como Instituto Nacional de Ensinanzas Integradas (INEI) ao Ministerio de Sanidade; posteriormente como Centro de Ensinanzas Integradas (CEI) ó Ministerio de Educación e Ciencia, pasando a denominarse Instituto de Educación Secundaria e Profesional (IESP). Despois foi transferido á Consellería de Educación e Ordenación Universitaria da Xunta de Galicia coa denominación de IES Universidade Laboral. No curso 2021/22 foi incluído na categoría de Centros Integrados de Formación Profesional, pasando a ter o nome CIFP Universidade Laboral.
A superficie total reduciuse pola expropiación perimétrica por mor da construción da AP-9 e posteriormente pola subdivisión do recinto en cinco entidades de funcionamento autónomo: o Complexo Deportivo (dependente da Secretaría Xeral de Deportes e Xuventude), o CPI Sofía Casanova, o Centro Residencial Docente, o IES Eduardo Blanco Amor e o propio CIFP Universidade Laboral.
Oferta educativa
[editar | editar a fonte]A orientación profesional de Marítimo-Pesqueira ampliouse a outras familias profesionais (Electricidade, Frío e Climatización, Electrónica de Comunicacións e Caldeirería), BUP, COU, estudos da UNED e ensinanza profesional de adultos. Andando os anos incorporouse ós novos proxectos educativos deseñados polo MEC (Bacharelatos, FP específica, Educación permanente de adultos (EPA) e Programas de Garantía Social). Despois, ao pasar a ser Centro Integrado de Formación Profesional, deixou de impartir o Bacharelato.