Bhaurao Patil

Na Galipedia, a Wikipedia en galego.
Saltar ata a navegación Saltar á procura
Bhaurao Patil
Bhaurao Patil.jpg
Nacemento22 de setembro de 1887
 Kumbhoj
Falecemento9 de maio de 1959
NacionalidadeIndia, Raj Británico e Domínio da Índia
RelixiónXainismo
Ocupaciónasistente social
PremiosPadma Bhushan
editar datos en Wikidata ]

Bhaurao Patil, nado en Kumbhoj o 22 de setembro de 1887 e finado o 9 de maio de 1959, foi un activista educativo e social de Maharashtra na India. Fundador da organización educativa Rayat Shikshan Sanstha e avogado da educación das masas, defendeu con fervor a educación das castas máis baixas e dos pobres e foi un importante membro da Satyashodhak Samaj fundada polo reformador social anticastas Jyotirao Phule. En Maharashtra déronlle o sobrenome de Karmaveer[1] (heroe en acción) e o goberno da India concedeulle a condecoración do Padma Bhushan en 1959.

Traxectoria[editar | editar a fonte]

Bhaurao naceu no seo dunha familia xainista, seu pai, Paigaunda Patil, era funcionario do departamento de impostos e decote estaba fóra da casa en viaxes de traballo, e súa nai, Gangubai, durante esas viaxes volvía á casa de seu pai, en Kumbhoj, e alí foi onde naceu Bhaurao, que pasou boa parte da súa infancia con seus outros irmáns e con súa nai cas do avó[2]. En 1902 con 16 anos entrou no instituto de Kolhapur e quedou moi influído pola política do seu maharaxá, Shahu, que avogaba pola igualdade social sen distinción de castas e pola extensión da educación a todos os seus súbditos, e mesmo chegou a pasar un ano no seu palacio[3]cos loitadores que patrocinaba o maharaxá. Tras deixar o instituto en 1907 traballou como vendedor ou axente de seguros. En 1909 coa axuda de varios amigos estableceu na vila de Dudhagaon unha sociedade educativa que mantiña a Vidyarthi Ashram[4], un hostal para que os nenos dos arredores puidesen ir á escola. Durante a sesión anual da Satyashodhak Samaj que se celebrou en Kale o 5 de setembro de 1919 fixo un chamamento para a creación dunha sociedade educativa para que o ensino chegase masivamente á poboación rural, e 4 de outubro dese ano constituíuse a Rayat Shikshan Sanstha, co carácter de empresa privada[5], establecéndose de inmediato un hostal para estudantes en Kale. En 1924 estableceuse un gran hostal en Satara e en 1935 a Rayat Shikshan Sanstha transformouse en asociación. Patil e a súa asociación foi ampliando o seu ámbito de actuación e en 1935 estableceu unha escola para a educación de mestres non brahmán[6] e o número de escolas primarias pasou de 61 en 1938 a 579 en 1949 e o de secundarias de 1 en 1940 a 111 en 1959 e nese mesmo ano, ao do falecemento de Patil, contaba con 38 hostais para estudantes e 6 escolas de maxisterio[7].

Notas[editar | editar a fonte]

  1. Sanjay Dattajirao Thorat (2018) Karmveer Bhaurao Patil an Egalitarian Nativist. Laxmi Book Publication, p. 2
  2. Kadiyal, R A (1979)A Critical Study of the Contribution of Karmaveer Dr. Bhaurao Patil to the Educational Thought, Practices and Development of Education in the Stateof Maharashtra. Tese da Universidade Shivaji, pp. 233-234
  3. Anjilvel Matthew (1957) Karmaveer Bhaurao Patil Rayat Shikshan Sanstha, Satara, p. 62
  4. S. A. Kakrambe (1983) Karmaveer Bhauarao Patil and mass education movement: its political impact on Maharashtra Somaiya, p. 72
  5. Sanjay Thorat "Study of Biography of Karmveer Bhaurao Patil"Review o f Research Volume 7 nº 12 setembro de 2018
  6. Sabyasachi Bhattacharya (2002) Education and the Disprivileged: Nineteenth and Twentieth Century India Orient Blackswan, p. 46
  7. Satish Deshpande e Usha Zacharias (2013) Beyond Inclusion: The Practice of Equal Access in Indian Higher Education. Routledge, p. 79