Beifudi (sitio neolítico)

Na Galipedia, a Wikipedia en galego.
Localización da Provincia de Hebei en China

O lugar prehistórico de Beifudi (北福地), sito preto de Yixian, na Provincia de Hebei, China, é o sitio arqueolóxico dunha recentemente descuberta aldea prehistórica neolítica que, segundo os arqueólogos chineses, é un dos máis importantes e antigos sitios atopados desa época.[1]. As escavacións foron dirixidas por Duan Hongzhen.

Características[editar | editar a fonte]

As primeiras noticias sobre a existencia dun sitio arqueolóxico en Beifudi remontan a 1985, aínda que non foi escavado até unha campaña realizada durante 2003-2004.

O sitio, cunha área de 3 ha na beira norte do río Yishui, contén artefactos dunha cultura contemporánea da Cultura de Cishan e da de Xinglongwa, datábeis arredor de -8000 / -7000, dous círculos culturais ben coñecidos, sitos ao leste das Montañas Taihang, e que enche un baleiro arqueolóxico entre ambas as dúas culturas do norte de China. A área total escavada é de máis de 1.200 m². A colección de achados neolíticos do sitio pode ser datada en dúas fases.[1]

Este sitio arqueolóxico foi votado na xuntanza anual dos arqueólogos chineses como o primeiro entre os dez máis salientables dos lugares descubertos no ano 2004.[2]

Achados[editar | editar a fonte]

O descubrimento máis significativo das escavacións da primeira fase, cunha cronoloxía de -8000 / -7000, foi o elevado número de máscaras de cerámica, con formas humanas e de animais, as máis antigas atopadas en escavacións até agora. En Beifudi foron desenterradas unha ducia de carantoñas con rostro humano, de gato, de macaco e de porco. Unha das caretas humanoides ten o nariz e a boca realizada en baixorrelevo, é dicir relevo tipo exciso, entanto os ollos son realizados polo método de perfurado. Tal descubrimento, inédito en xacementos desta época, e que son dos primeiros artefactos de barro con gravados efectuados por excisión, engade varios milenios á historia chinesa do baixorrelevo.[2]

Eses artefactos, xunto con as plataformas elevadas, ou altares, atopadas, poden fornecer información sobre da relixión primitiva e das prácticas chamánicas da China Setentrional.[3][4] Aínda que as crenzas desas xentes neolíticas non son coñecidas, os chineses primitivos efectuaban sacrificios rituais e cremación de cadáveres (fanyi) sobre plataformas elevadas. Atopáronse tanto enterramentos de humanos como de animais. Cóidase que as máscaras formaban parte dos ritos a realizar durante os sacrificios e os enterramentos.[5]

Os obxectos atopados nas escavacións, correspondentes á segunda fase cronolóxica, datábel entre -7000 / -6500, comprenden cerámica e artefactos líticos. A cerámica está formada por recipientes fu de fondo redondo, recipientes asentables, e máis concas bo, así como potes con dupla asa de boca pequena.[1] Os arqueólogos tamén desenterraron os restos de dez cubertas de vivendas semisubterráneas, que estaban concentradas nunha parte do sitio, e nas que aparece unha disposición sistemática, coa cociña e áreas de xuntanza no centro dos habitáculos. Entre os artefactos achados nestas vivendas inclúense bloques de pedra, materiais de construción e pedazos de cerámica rota. Tamén se encontraron pozos de cinzas, lugares de sacrificio, pezas de xade e así mesmo máscaras, con baixorrelevos, de cerámica, moi ben conservadas.[6]

Conclusións[editar | editar a fonte]

Baseándose en datos arqueolóxicos, xeolóxicos e antropolóxicos, os actuais investigadores ven as orixes da Civilización chinesa como a historia das interaccións entre culturas e grupos étnicos moi diferentes que influenciaron o desenvolvemento duns e doutros. Como o sitio de Beifudi atópase na China do Norte, onde o clima é máis seco que na do Sur, é verosímil que a cultura do lugar cultivase paínzo, aínda que non se atopou ningunha evidencia directa de tal feito. O achado de ferramentas de pedra para procesar os alimentos non é unha proba fiable de que a cultura de Beifudi desenvolvese a agricultura, xa que tales instrumentos foron usados desde antes de que aparecese o cultivo.[7]

A importancia do sitio prehistórico de Beifudi asenta no seu potencial para fornecermos información arqueolóxica acerca das crenzas e das prácticas cerimoniais desta primitiva cultura, a través dos antiquísimos artefactos con baixorrelevos aquí atopados, así como datos para comprendermos mellor os comezos da arquitectura chinesa.

Notas[editar | editar a fonte]

  1. 1,0 1,1 1,2 "New Archaeological Discoveries and Researches in 2004 -- The Fourth Archaeology Forum of CASS". Institute of Archaeology - Chinese Academy of Social Sciences. http://www.kaogu.cn/en/detail.asp?ProductID=982. Consultado o 2007-09-18. 
  2. 2,0 2,1 "Top Ten Archaeological Discoveries of 2004". chinatoday.com. http://www.chinatoday.com.cn/English/e2005/e200509/p54.htm. Consultado o 2007-09-18. 
  3. "Prehistoric Site at Beifudi, Yixian County, Hebei Province.". china.org.cn. http://www.china.org.cn/english/features/Archaeology/149496.htm#1. Consultado o 2007-09-18. 
  4. "Beifudi prehistoric site, Yixian county, Hebei province Date: neolithic". chinaheritagenewsletter. http://www.chinaheritagenewsletter.org/articles.php?searchterm=002_topten.inc&issue=002. Consultado o 2007-09-18. 
  5. Lui Xujie. Chinese Architecture. The Origins of Chinese Architecture. Yale University Press, 2002. páxs. 16-18. ISBN 0-300-09559-7
  6. "Ruins of prehistoric village discovered in N. China". People's Daily Online. http://english.people.com.cn/200502/28/eng20050228_174889.html. Consultado o 2007-09-18. 
  7. Patricia Ebrey. The Cambridge Illustrated History of China. Cambridge University Press, 2006. páxs. 12-18. ISBN 0-521-43519-X

Ligazóns externas[editar | editar a fonte]