Lagoa de Aguere
A lagoa de Aguere é o nome que recibía un espazo situado xunto a zona vella da cidade de San Cristóbal de La Laguna na illa de Tenerife (Canarias), que deu nome á localidade. Foi desecada no século XIX.
Toponimia[editar | editar a fonte]
Recibiu o nome de La Laguna desde a chegada dos conquistadores casteláns no século XV. Porén, o nome orixinal guanche, idioma falado polo pobo orixinario da illa, era Aguere.[1]
Características[editar | editar a fonte]
O lugar era usado polos pobos aborixes como área de pastoreo, aproveitamento dos froitos dos mocáns e os érbedos e, posibelmente, a caza de aves.[2]Segundo o inglés Edmond Scory, os pobos guanches crían que as almas boas e valentes habitaban no val de Aguere.[3]
Nas súas proximidades tivo lugar a Batalla da Lagoa, que enfrontou a guanches e tropas castelás durante a conquista da illa en 1496. Tras a conquista, o adiantado Alonso Fernández de Lugo fundou nas súas marxes a nova cidade de San Cristóbal de la Laguna, de urbanismo tipicamente castelán.[4]
Sábese que a lagoa era navegábel. En documentos antigos menciónase que os frades do convento de San Miguel das Vitorias cruzaban a lagoa nunha pequena embarcación cara ao centro da cidade e posteriormente de regreso ao convento.
Desaparición[editar | editar a fonte]
O escritor José de Viera y Clavijo recolle que, polo menos desde o século XVIII, realizáronse obras de drenaxe da lagoa, por ser unha zona de pantanos e de bulleiros.[5]
Durante o temporal que en 1826 afectou as Canarias, a lagoa desbordouse e asolagou a cidade.
En 1837 a Comandancia de Ingenieros drenou a auga. Para 1839 a lagoa xa fora completamente desecada, segundo o xeólogo Sabino Berthelot. Olivia Stone escribiu en 1888 que, malia a lagoa desaparecer por completo, reaparecía na época de chuvias como unha área pantanosa.[5]
Na actualidade, o terreo atópase sepultado polo desenvolvemento urbanístico de San Cristóbal de la Laguna.
Véxase tamén[editar | editar a fonte]
Notas[editar | editar a fonte]
- ↑ Abréu Galindo, Juan de (1848). Historia de la conquista de las siete islas de Gran Canaria. Santa Cruz de Tenerife: Imprenta, Litografía y Librería Isleña. Arquivado dende o orixinal o 12 de decembro de 2018. Consultado o 31 de xaneiro de 2022.
- ↑ "La Laguna al oído". Arquivado dende o orixinal o 18 de marzo de 2017. Consultado o 31 de xaneiro de 2022.
- ↑ Bonnet Reverón, Buenaventura (1936). "Observaciones del caballero inglés sir Edmond Scory acerca de la isla de Tenerife y del Pico del Teide" (PDF) (8). Las Palmas de Gran Canaria: El Museo Canario: 44–59. ISSN 0211-450X.
- ↑ "Reseña histórica de San Cristóbal de La Laguna". Arquivado dende o orixinal o 11 de xuño de 2017. Consultado o 17 de marzo de 2017.
- ↑ 5,0 5,1 "Hace 175 años fue desecada la laguna que le da nombre a la ciudad de Aguere". Arquivado dende o orixinal o 24 de xaneiro de 2022. Consultado o 31 de xaneiro de 2022.