Wok

A cociñar nun wok ao estilo stir frying.

O wok [en chinés tradicional, 鑊; chinés simplificado: 镬; hanyu pinyin: guò (en mandarín), wok (en cantonés)] é unha especie de tixola empregada no Extremo Oriente e no Sueste asiático.

O carácter chinés 鑊 é idéntico a 鍋 de acordo coas pescudas lingüísticas realizadas. Trátase dunha especie de tixola redonda e é característica por ser cóncava no fondo, o tamaño medio acostuma ser de 30 cm ou máis de diámetro. Adoita estar feita de aceiro, ferro fundido e incluso se atopan exemplares de aluminio.

Usos

Esta tixola emprégase para saltear (stir frying) os alimentos mediante un movemento constante denominado na gastronomía chinesa (cantonesa) coma "wok hei" (trátase dunha habilidade para tirar o qi do wok, deste xeito os alimentos manteñen o seu sabor e o seu recendo intactos). Ademais de saltear alimentos, o wok pode ser usado tamén para frixir ou cociñar ao vapor colocando enriba unha cesta vaporizadora de bambú (ou mushiki).

Emprego

• Cómpre usas o wok moi quente e cunha lapa alta.
• Cómpre pequecerlo durante un minuto.
• Para saltear utilízase un mínimo de aceite.
• Unha vez que se engaden os ingredientes cómpre remexer constantemente (stir frying).
• Unha vez usado o wok só se lava con auga quente e unha brocha de bambú.
• Para gardalo débese secar e protexer cunha camada de aceite para evitar a ferruxe.
• A vez primeira que se usa un wok novo cómpre "curalo", para crear unha tona protectora. A cura faise poñendo o wok con aceite no lume para se queimar e cole á súa superficie.

Vantaxes

A principal vantaxe do wok, alén dos materiais que se empreguen na súa elaboración, é a parte cóncava existente no seu interior. Esta forma fornece unha pequena rexión de calor intensa no fondo da tixola cunha cantidade relativamente pequena de combustíbel. A forma permite ademais remexer os alimentos en diferentes partes da tixola sen que exista perigoo de envorcadura. As paredes curvadas proporcionan a posibilidade de que ningún alimento quede pegado na súa superficie, e se o fai a temperatura é bastante inferior á do fondo e polo tanto non se ha queimar (dando lugar a un cambio de sabores).

Véxase tamén

Outros artigos

• Tixola
• Karahi