Show Me a Hero é unha miniserie de televisión estadounidense creada por David Simon e William F. Zorzi, e dirixida por Paul Haggis. A historia está baseada en feitos reais recollidos no libro homónimo da xornalista do The New York Times, Lisa Belkin. Os seis capítulos estreáronse na HBO do 16 ao 30 de agosto de 2015. De forma simultánea, en España foron emitidos por Canal + Series.
A serie está ambientada na cidade de Yonkers (Nova York) dende 1987 ata 1993. O alcalde Nick Wasicsko ten que acatar unha orde xudicial pola que deberán construírse vivendas protexidas nos barrios de clase media para a xente sen recursos, na súa maioría de raza negra. Os intentos de eliminar a segregación racial existente xerarán tensións entre as diferentes comunidades e os políticos locais. A través dun elenco de actores coral, móstrase a evolución cronolóxica do proxecto e como os conflitos sociais, raciais e políticos afectan á vida cotiá.
