Robert W. Paul

Robert W. Paul

Biografía
Nacemento	3 de outubro de 1869 Highbury, Reino Unido (pt)
Morte	28 de marzo de 1943 (73 anos) Putney, Reino Unido (pt)
Actividade
Campo de traballo	Filme e discoveries and inventions (en)
Ocupación	enxeñeiro, director de fotografía, científico, produtor de cinema, inventor, director de cinema, actor
Premios
(1938)  Medalla e Premio Gabor
Descrito pola fonte	Obálky knih,

Robert W. Paul, nado en Highbury o 3 de outubro de 1869 e finado en Putney o 28 de marzo de 1943 foi un inventor e pioneiro do cinema británico.

Traxectoria

Paul comezou a súa carreira como técnico aprendendo a fabricar instrumentos en Elliott Brothers, compañía londiniense fundada en 1804. En 1891 fundou a súa propia compañía, Robert W. Paul Instrument Company, cun obradoiro en Hatton Garden, Londres, que logo foi o seu despacho.

En 1894 dous homes de negocios gregos pedíronlle copias do kinetoscopio de Thomas Edison. Inicialmente negouse, pero logo descubriu que Edison non patentara o invento en Inglaterra, polo que púxose a desenvolver a súa propia versión do kinetoscopio mediante enxeñería inversa. Construíu varios destes aparatos e un deles foi a parar a Georges Méliès.

Porén, os únicos filmes dispoñibles eran copias dos producidos para a máquina de Edison coa súa cámara patentada (da que os detalles eran totalmente secretos), polo que Paul decidiu crear a súa propia cámara tamén. Presentáronlle a Birt Acres, experto fotógrafo, que inventara un dispositivo para mover a película como parte do proceso de revelado. Paul pensou que a idea deste invento podía ser empregada nunha cámara, e a Paul-Acres Camera, inventada en marzo de 1895, foi a primeira fabricada en Inglaterra.

Paul conseguiu unha concesión para facer unha exhibición do kinetoscopio en Earls Court Exhibition Centre, e o éxito levouno a pensar na posibilidade de proxectar imaxes en movemento nunha pantalla, algo que Edison nunca considerara. Pouco despois do desenvolvemento da cámara Paul e Acres disolveron a súa sociedade e convertéronse en competidores nos mercados das cámaras e os proxectores. Acres presentou o seu proxector o 14 de xaneiro de 1896 e Paul o Theatrograph o 20 de febreiro, o mesmo día da primeira proxección en Londres dos filmes dos irmáns Lumière. Tras varias demostracións perante grupos de científicos, puido realizar a súa primeira exhibición pública o 25 de marzo de 1896 no Alhambra Theatre en Leicester Square. Entre os filmes presentados incluíanse algúns debuxados por Tom Merry nos que aparecían caricaturas do emperador alemán Guillerme II e Otto von Bismarck (1895). Merry xa desenvolvera un espectáculo de debuxo rápido como parte do music-hall. O uso do Theatrograph en teatros de todo o país popularizou o cinema no Reino Unido, onde moita xente do mundo do espectáculo intentou imitar o éxito de Paul e algúns querían facer filmes de interese local.

Paul continuou coas súas innovacións no campo das cámaras portátiles. A 'Cinematograph Camera No. 1', construída en abril de 1896 foi a primeira en dispoñer de arranque inverso, mecanismo que permitía expoñer a mesma película varias veces. Isto permitía crear superposicións, empregadas no filme de 1901 Scrooge, or, Marley's Ghost, primeira adaptación de Un conto de Nadal, de Charles Dickens.

En 1898 deseñou e construíu en Muswell Hill o primeiro estudio cinematográfico británico.

Mentres continuaba cos seus negocios orixinais, especialmente no recoñecido galvanómetro Unipivot. Cos seus instrumentos gañou medallas nas exposicións de St Louis (1904) e Bruxelas (1910) entre outras. Co estalido da primeira guerra mundial comezou a producir instrumentos militares como uns dos primeiros conxuntos para a telegrafía sen fíos. En decembro de 1919, a Cambridge Scientific Instrument Company comprou a Robert W. Paul Instrument Company e converteuse na The Cambridge and Paul Instrument Company Ltd. O nome foi abreviado a Cambridge Instrument Co Ltd en 1924 cando se converteu nunha compañía pública.

Paul continuou a realizar os seus propios filmes, vendéndoos directamente ou a través das novas compañías de distribución. Como director foi moi innovador no uso de primeiros planos e na montaxe. Porén, os seus intereses de negocios desprazaron o cinema e deixou a industria en 1910. Non obstante, a súa importancia xa foi recoñecida polos seus contemporáneos.

Filmografía

• The Derby (1895)
• Footpads (1895)
• The Oxford and Cambridge University Boat Race (1895)
• Rough Sea at Dover (1895)
• Blackfriars Bridge (1896)
• Comic Costume Race (1896)
• A Sea Cave Near Lisbon (1896)
• The Soldier's Courtship (1896)
• The Twins' Tea Party (1896)
• Two A.M.; or, the Husband's Return (1896)
• Robbery (1897)
• Come Along, Do! (1898)
• A Switchback Railway (1898)
• Tommy Atkins in the Park (1898)
• The Miser's Doom (1899)
• Upside Down; or, the Human Flies (1899)
• Army Life; or, How Soldiers Are Made (1900)
• Chinese Magic (1900)
• Hindoo Jugglers (1900)
• A Railway Collision (1900)
• Artistic Creation (1901)
• Cheese Mites; or, Lilliputians in a London Restaurant (1901)
• The Countryman and the Cinematograph (1901)
• The Devil in the Studio (1901)
• The Haunted Curiosity Shop (1901)
• The Magic Sword (1901)
• An Over-Incubated Baby (1901)
• Scrooge, or, Marley's Ghost (1901)
• Undressing Extraordinary (1901)
• The Waif and the Wizard (1901)
• The Extraordinary Waiter (1902)
• A Chess Dispute (1903)
• Extraordinary Cab Accident (1903)
• The Voyage of the Arctic (1903)
• The Unfortunate Policeman (1905)
• The '?' Motorist (1906)
• Is Spiritualism A Fraud? (1906)

Véxase tamén

Ligazóns externas

• Robert W. Paul na IMDb (en inglés).
• Robert William Paul (Who's Who of Victorian Cinema)