Morenosita

Morenosita
Fórmula química	NiSO4 · 7H2O
Clase	Sulfato
Sistema cristalino	Ortorrómbico
Cor	Verde esmeralda, branco verdoso
Brillo	Vítreo
Dureza	2 - 2,5 (escala de Mohs)
Fractura	Concoidea
Exfoliación	Boa
Raia	Branca verdosa
Densidade	2,0 g/cm3

A morenosita é un mineral de níquel pouco frecuente descuberto polo mineraloxista Casares en 1850 xunto coa zaratita e presentado nun traballo publicado por Martínez Alcíbar. Foi atopado por vez primeira en Teixidelo, lugar da parroquia de Santo André de Teixido, concello de Cedeira.

Aparece en forma de eflorescencias coma produto de alteracións da millerita. O seu nome deriva do mineralista Antonio Moreno Ruiz, da Academia de Ciencias Naturais (1796-1852).

Outro nome que recibe este mineral é epimillerita.

Propiedades

A morenosita é un mineral verde esmeralda ou branco verdoso de brillo vítreo que cristaliza no sistema ortorrómbico. É soluble en auga e deshidrátase ao aire libre, transformándose en retgersita (NiSO₄ · 6H₂O). Para evitar a perda da auga de hidratación, débese conservar nun recipiente cerrado ou en plástico.

Existe unha serie completa entre a morenosita e a epsomita (MgSO₄ · 7H₂O).

Morfoloxía e formación

Aparece en forma de pequenos cristais, estalactitas ou encostramentos. Os cristais naturais presentan forma acicular e os cristais sintéticos son prismáticos.

É un mineral secundario encontrado na zona oxidada de depósitos minerais hidrotermais que conteñen níquel, formado en solución acuosa a unha temperatura inferior a 31,5 °C.

Depósitos

Os depósitos de morenosita son bastante escasos. O tipo nomenclatural localízase no Cabo Ortegal (Galiza). Outros depósitos son os existentes na Alemaña —en Horbach (Baden-Württemberg)—, nos Montes Metalíferos (República Checa) e no Perú —en Cerro de Pasco (Departamento de Pasco)— .

Véxase tamén

Outros artigos

• Lista de minerais

Ligazóns externas

• Morenosite (Mindat.org)
• Morenosite Mineral Data (Webmineral)
• Handbook of Mineralogy Arquivado 01 de agosto de 2012 en Wayback Machine.