Lavadoiro
Un lavadoiro é un lugar destinada ao lavado da roupa.
Antigamente, o lavadoiro era o lugar dentro ou fóra do fogar no que se lavaba a roupa a man sobre unha táboa ou pedra lisa que tamén recibía este nome, moitas veces no mesmo río ou regueiro. Cos anos, e especialmente en Galicia, os lavadoiros que adoitaban ser públicos, de uso colectivo, convértense nunha construción popular preto das fontes que consistía nunha canle que leva a auga a un ou varios depósitos de granito ou formigón que contan con lousas inclinadas para permitir o lavado a man. A miúdo contan cunha cuberta sostida por catro ou seis piares de pedra a xeito de alpendre. As cubertas soen ser a catro augas con dúas tesoiras de madeira. O número de lavadoiros medrou nas aldeas especialmente no século XX, antes da chegada da lavadora individual.
Nun fogar moderno, un lavadoiro está equipado cunha lavadora e cunha secadora automáticas, e, a miúdo un lavabo grande para lavar a man os artigos delicados tales como xerseis; así como unha táboa de pasar o ferro. Moitas veces o lavadoiro áchase no soto das vivendas, mais en moitas casas modernas pódese atopar no piso terreo preto da cociña ou no primeiro andar preto dos cuartos.
