J. Castro
| J. Castro Sociedad en Comandita. Fábrica Hispano-Suiza de Automóviles | |
|---|---|
 Automóbil Castro de 1902. | |
| Fundación | Novembro de 1902 |
| Disolución | Marzo de 1904 |
| Localización | Barcelona, Cataluña |
| Persoas clave | José María Castro Fernández Marc Birkigt |
| Industria | Transporte |
| Produtos | Automóbiles |
| [ editar datos en Wikidata ] | |
J. Castro ou simplemente Castro foi unha empresa catalá fabricante de automóbiles operativa en Barcelona entre os anos 1902 e 1903 (disolveuse ao ano seguinte).
Historia
[editar | editar a fonte]De La Cuadra a Castro
[editar | editar a fonte]O empresario galego José María Castro Fernández, nado en 1845 en Trebolle (A Torre, O Páramo), foi destinado en 1897 a Vic para dirixir a delegación do Banco Vitalicio de España.[1][2]
Tras o colapso da marca La Cuadra en 1901, Castro, principal acredor da firma, en sociedade con outros emprendedores, entre os que se atopaba Marc Birkigt (que será o director técnico da compañía), decidiu proseguir a fabricación dos autos e creou en novembro de 1902 a J. Castro Sociedad en Comandita, Fábrica Hispano-Suiza de Automóviles, adquirindo as instalacións, equipos e autos en construción, e facéndose coa maioría do equipo humano. Os automóbiles serán comercializados desde entón coa marca Castro.
Modelos
[editar | editar a fonte]A actividade da nova fábrica, situada en Barcelona na rúa de Floridablanca, empezou por rematar os vehículos que quedaran a metade de fabricación en De la Cuadra.
Unha vez trasladada a fábrica, xa en 1903, presentouse un novo modelo moi avanzado, o 10 HP, cun motor de 1884 cc cos dous cilindros fundidos nun único bloque e con radiador de niño de abella, cambio de 4 velocidades, transmisión por cardán, e instalación eléctrica con dínamo opcional, toda unha demostración do talento de Birkigt. Deste modelo vendéronse varios exemplares, e este éxito animou á marca a fabricar poucos meses despois un modelo máis ambicioso, o 14 HP, con motor de 4 cilindros e 2412 cc e, por descontado, coas vangardistas solucións xa vistas no 10 HP. Seica chegou a producirse tamén unha variante potenciada do 10 HP, o 12 HP.
De Castro a Hispano-Suiza
[editar | editar a fonte]Aínda que os Castro se consideraron no seu tempo uns coches excelentes por calidade e por manexo, a empresa, falta de recursos económicos, nos últimos meses de 1903 entrou en crise. O 11 de decembro dese ano pecháronse definitivamente os talleres e en marzo de 1904 disolveuse a sociedade.[3]
Castro, como tal, parece que vendeu tan só 8 ou 10 unidades entre 1902 e 1903,[4] aínda que a súa estrutura, recapitalizada convenientemente, terá continuidade co nome de Hispano-Suiza, e así serán terminados e vendidos en 1904 outros dous exemplares que serán catalogados como Hispano-Suiza tipo 10 T. O 14 HP será a base do primeiro dos Hispano-Suiza, o tipo 14, mentres o T 20 ou 20 HP tamén provén dun concepto iniciado por Birkigt na etapa Castro.
Notas
[editar | editar a fonte]- ↑ La marca iniciada por un gallego que plantó cara a Mercedes y Rolls Royce: La Hispano-Suiza (22-01-2023). El Español.
- ↑ "Castro". vehiculoclasico.es (en castelán). 17 novembro de 2003. Arquivado dende o orixinal o 5 de marzo de 2016.
- ↑ Castro (1902-1903). Autopasion18.com.
- ↑ Así eran los primeros coches fabricados en España (12-03-2019). Diario ABC.
Véxase tamén
[editar | editar a fonte]Bibliografía
[editar | editar a fonte]- Gimeno Valledor, P. (1993). El automóvil en España. Su historia y sus marcas. Madrid: Real Automóvil Club de España.