Hemimetabolismo
O hemimetabolismo ou paurometabolismo,[1] tamén chamado metamorfose incompleta, é o tipo de desenvolvemento propio dalgúns grupos de insectos, que consta unicamente de tres fases: ovo, ninfa e imago ou adulto. Este tipo de metamorfose prodúcese por cambios graduais e nela falta a etapa de pupa, que teñen outros insectos, chamados holometábolos. A ninfa adoita parecerse ao adulto e coma el ten ollos compostos e patas desenvolvidas; mais non ten ás nin órganos sexuais maduros (funcionais); isto último é un carácter diagnóstico.[2] Unha vez que o individuo xove (a ninfa) muda a un estadio con órganos sexuais, xa deixa de mudar e chega ao último estadio, o de adulto. Os insectos que posúen este tipo de desenvolvemento denomínanse hemimetábolos ou paurometábolos.[3].[4]
Descrición[editar | editar a fonte]
Na metamorfose sinxela, simple ou incompleta (paurometabolismo ou hemimetabolismo) o individuo pasa por varias mudas ata transformarse en individuo adulto sen pasar por unha fase de inactividade e sen deixar de se alimentar. Os estadios xoves ou inmaturos aseméllanse ao adulto excepto en que son máis pequenos, carecen de ás e non son maduros sexualmente. Tamén poden ter menor número de segmentos corporais. Este tipo de metamorfose sinxela dáse nalgúns insectos e tamén en anélidos, equinodermos, moluscos e crustáceos. Neste tipo de metamorfose as fases xoves dos insectos denomínanse ninfas. Son exemplos disto as chinches e os saltóns, que se parecen aos seus proxenitores, pero son máis cativos. Na última muda remata o desenvolvemento das ás, os xenitais externos (xeralmente edeago nos machos e ovipositor nas femias) e as estruturas sexuais secundarias como tímpanos e órganos estridulatorios. A anatomía interna sofre cambios relacionados coa vida adulta tales como a elaboración de musculatura torácica necesaria para o voo, reorganización do sistema nervioso para o control do voo e desenvolvemnto de gónadas cos seus respectivos ductos e glándulas accesorias; os sistemas dixestivo e excretor (tubos de Malpighi) non sofren maiores cambios porque o adulto adoita manter os mesmos hábitos alimenticios que a ninfa.[5]
Ordes de insectos hemimetábolos[editar | editar a fonte]
As ordes de insectos nas que se dá o hemimetabolismo son:
- hemípteros (chinches, pulgóns e carricantas)
- ortópteros (saltóns, grilos)
- mantodeos (barbantesas)
- blatodeos (cascudas)
- dermápteros (cadelas dde frade)
- odonatos (libélulas, cabalos do demo)
- fasmatodeos (insectos pau)
- efemerópteros (efémeras)
- ftirápteros (piollos)
- plecópteros
- notópteros
Notas[editar | editar a fonte]
- ↑ Antonio., Becerril Flores, Marco. Parasitología médica. ISBN 9786071505125. OCLC 861525563.
- ↑ Baluch, Page (29 de abril de 2011). "Incomplete Metamorphosis Has Three Stages: Egg, Nymph, and Adult". ASU - Ask A Biologist. Arizona State University School of Life Sciences Ask A Biologist. Consultado o 2 de setembro de 2019.
- ↑ McGavin, George C. Essential Entomology: An Order-by-Order Introduction. Oxford: Oxford University Press, 2001. pp. 20.
- ↑ Gullan, P. J.; Cranston, P. S. (2014). The Insects: An Outline of Entomology (5ª ed.). John Wiley & Sons, Ltd. p. 241.
- ↑ H. Frederik Nijhout. 1994. Insect Hormones. Princenton University press.
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- Desarrollo y Metamorfosis de Insectos. Zoología Agrícola. Facultad de Ciencias Agropecuarias. UNC.
