Festa dos Alborotados

Na Galipedia, a Wikipedia en galego.
A Festa dos Alborotados, Praza de Henrique IV

A romaría dos Alborotados celebrábase de vello no santuario dos Remedios en Betanzos o 27 de setembro na honra de Nosa Señora dos Remedios e máis de San Miguel.

Unha novena precedía ao día da festa, no que, ao igual que no día dos Remedios, chegaban ao templo romeiros das máis variadas procedencias. O nome viría pola afluencia de endemoñados ou “alborotados” que acudían en demanda de auxilio onda Nosa Señora e San Miguel.

Co paso do tempo a celebración estritamente relixiosa foi perdendo empuxe, e no xa distante 1979 os veciños da barriada da Ponte Vella decidiron dar un aire anovado á romaría dos Alborotados. Naceu así a Festa do Viño Mosto, na que as uvas acabadas de vendimar eran espremidas ante a concorrencia para catar o primeiro mosto betanceiro. Este novo empuxe axudou a renovar o agarimo dos betanceiros cos Alborotados de sempre e máis coa nova festa, espello da cultura vitivinícola betanceira.

A festa estivo sen celebrarse por varios anos ata que en 2006 o colectivo veciñal e o Consello da Mocidade de Betanzos, apoiado pola Concellaría de Xuventude e a raíz dunha iniciativa conxunta dos colectivos xuvenís Lar de Unta e Galiza Nova, decidiron darlle novo impulso á celebración, retomando a Festa do Viño Mosto. Varios colectivos xuvenís betanceiros implicáronse daquela na vendima previa á celebración da festa e na organización da propia festa xunto á comisión veciñal. Un concerto para os máis novos a cargo da Banda Potemkin e unha orquestra tradicional para os máis maiores compuxeron o apartado musical dunha celebración aberta cunha sesión vermú e retomada co pisado da uva na Eira Vella tras a descarga dos goxos chegados por un tractor engalanado, ao son das gaitas. A experiencia repetiuse ao ano seguinte, mais novamente en 2008 non se celebrou a festa.