Candeán, Vigo

San Cristovo de Candeán é unha parroquia do concello de Vigo.

Situación de Candeán

• Limita coas parroquias de Cabral, Lavadores, San Paio e Teis e pertence ó arciprestado de Vigo-Lavadores.

• Ten 12 entidades de poboación, 8 lugares e 4.699 veciños (2003)

• As súas entidades de poboación son as seguintes: Besada (17), Candeán de Arriba (599), A Devesa (904), A Fonte Escura (1.254), Freiría (91), Goleta (59), Hermide (94), A Igrexa (436), Monte Pequeno (326), Parachán (369), A Rabadeira (485) e O Salgueiro (65).

• Os lugares (que xeralmente forman parte dalgunhas das entidades): Candeán de Abaixo, A Costeira, A Fonte Barca, A Lagoa, A Madroa, Pedra Longa, A Poba e Xunco Mariño.

Conserva pegadas de asentamentos prehistóricos, coma petróglifos e dolmens. Existen restos dunha vella construción medieval defensiva que os veciños chaman "Da Torre". A igrexa de San Cristovo foi construída a comezos do século XIX. No cemiterio atópase un dos dous cruceiros da parroquia, construído probabelmente no 1887. Nas abas da Madroa atópanse un monumental dolmen coñecido coma "Casa dos Mouros", o zoolóxico de Vigo (único de Galiza con máis de 600 animais) e as instalacións deportivas auxiliares do Real Club Celta. O segundo domingo de setembro celébrase a Festa dos Pexegos.