Eclíptica

De xeito tradicional, chámase eclíptica á liña imaxinaria que describe a traxectoria do Sol sobre a esfera celeste ó longo dun ano. Por extensión tamén se chama eclíptica á proxección desta traxectoria sobre da Terra, formando así unha liña imaxinaria na superficie terrestre que describe un plano que forma un ángulo duns 23,44º con respecto ó ecuador terrestre.

De xeito técnico, dende a chegada do sistema heliocéntrico, chámase eclíptica ao plano da órbita terrestre arredor do Sol (que por forza coincide coa eclíptica definida de xeito tradicional no modelo xeocéntrico).

É nesta zona onde aparentemente se cruzan os camiños do Sol e da Lúa, onde se eclipsan.