Enrique Macías Ruiz
| Biografía | |
|---|---|
| Nacemento | 4 de decembro de 1923  Pontevedra, España |
| Morte | 18 de decembro de 2007 (84 anos) Vigo |
| Catedrático | |
| | |
| Datos persoais | |
| País de nacionalidade | España |
| Educación | Universidade de Santiago de Compostela |
| Actividade | |
| Campo de traballo | química |
| Lingua | Lingua castelá |
Enrique Macías Ruiz, nado en Pontevedra o 4 de decembro de 1923 e finado en Vigo o 18 de decembro de 2007, foi un químico e catedrático de matemáticas galego.
Traxectoria[editar | editar a fonte]
Estudou o bacharelato en Pontevedra e licenciouse en Ciencias Químicas en 1945, na Universidade de Santiago de Compostela. Entre 1946 e 1955 é profesor de matemáticas no Colexio Inmaculada Concepción de Pontevedra. Nese último ano fixa a súa residencia en Vigo e traballa dende entón en distintos centros de ensino (Labor, Maristas, Carmelitas, Muro e Alba). En 1965 ingresou no corpo de Profesores Agregados de Institutos Nacionais de Ensino Medio, e en 1979 foi nomeado Catedrático Numerario de Bacharelato. Estivo destinado en diferentes centros: Instituto Mixto de Ourense, IES Santa Irene de Vigo, INB Val Miñor de Nigrán, e finalmente dende 1981 como xefe do seminario de matemáticas no IB Castelao de Vigo, onde se xubilou en 1989. Entre os anos 1967 e 1976 foi director do Instituto A Guía de Vigo.
Cargos e Distincións[editar | editar a fonte]
Ademais de distintos cargos nos centros de estudos onde traballou, foi secretario do Colexio Oficial de Doutores e Licenciados en Filosofía e Letras e en Ciencias da provincia de Pontevedra; secretario de ANQUE Asociación Nacional de Químicos de España de Galicia e delegado para Galicia da Mutualidade Xeral de Previsión Social dos Químicos Españois.
Foi o promotor da Olimpíada galega de Química[1], participando dende 1980 nos tribunais das primeiras vinte edicións da mesma, labor pola que foi recoñecido no ano 2001 como "Colexiado distinguido" polo Colexio Oficial de Químicos de Galicia [2].
Notas[editar | editar a fonte]
- ↑ [1] Arquivado 23 de setembro de 2015 en Wayback Machine., pág. 64] "Historia de COLQUIGA, La Industria Gallega y el Medio Ambiente", publicado polo Ilustre Colexio Oficial de Químicos de Galicia no Cincuentenario da súa Fundación (2003)
- ↑ "Colegio Oficial de Químicos de Galicia, Asociación de Químicos de Galicia". Arquivado dende o orixinal o 28 de maio de 2014. Consultado o 13 de xuño de 2015.