Curicó (do mapudungun: kurü ko, negras augas) é un municipio, unha comuna e cidade chilena da VII rexión de Maule. A área da comuna é de 1.328 km² e tiña un total de 177 766 habitantes no ano 2015. Limita polo sur con Molina e Sagrada Familia, polo norte con Teno, polo oeste con Rauco e polo leste con Romeral. Curicó é unha das urbes máis poboadas do Val lonxitudinal ou Central chileno, xunto con Rancagua, Talca e Chillán.
Curicó ten un clima mediterráneo con estación seca prolongada no verán. Relativamente caloroso de novembro a marzo, con temperaturas máximas de 36 graos Celsius nos días máis calorosos.
O inverno (de xuño a agosto) é máis húmido, con temperaturas máximas diarias de 12 graos Celsius, e mínimas de pouco máis sobre o punto de conxelamento. A pluviosidade media é de 701,9 mm por ano. O clima é medio e a pluviosidade é máis abondosa na parte norte do val.
