Albireo, tamén coñecida como Beta Cygni (β Cyg), é unha estrela binaria da Constelación do Cisne. Albireo é unha estrela de terceira magnitude, popularmente coñecida como Peteiro da galiña.
O nome da estrela aparece por primeira vez nun texto árabe como al Minhar al Dajajah, os tradutores latinos non comprenderon o significado e convertérono en ab ireo, máis tarde considerouse unha errata e formaron a forma al bireo.
Vista con telescopio, obsérvase que é unha estrela dobre:
Albireo A é a estrela máis brillante (de magnitude aparente 3,1), é un xigante de temperatura inferior ao Sol, de cor amarela.
Albireo B (magnitude aparente 5,1), estrela con temperatura superficial maior cá do Sol, de cor azul.
As dúas están separadas por 34 segundos de arco, debido á súa diferenza de cor son claramente identificables. Están localizadas a 385 anos luz de distancia da Terra, e ao primeiro pensouse que era un efecto óptico.
