Deborah Ajakaiye

Deborah Enilo Ajakaiye, nada en 1940 no Estado de Plataeu, ao norte de Nixeria, é unha xeofísica nixeriana. É a primeira muller profesora de física en África e o seu traballo en xeofísica xogou un papel importante na minería en Nixeria.

Traxectoria

Ajakaiye naceu en 1940 na cidade de Jos, a capital do Estado de Plateau en Nixeria. Foi a quinta de seis fillos. Os seus pais crían na igualdade de educación entre os sexos e distribuían as tarefas domésticas entre os nenos e as nenas. En 1962 graduouse na Universidade de Ibadán cun título en física. Obtivo unha mestría na Universidade de Birmingham, en Inglaterra, e en 1970 obtivo un doutoramento en xeofísica na Universidade Ahmadu Belo, en Nixeria. Orixinalmente interesada nas matemáticas, Ajakaiye di que elixiu estudar xeofísica porque cría que podía axudar ao seu país.

Carreira

Ajakaiye converteuse na primeira muller profesora de física en África en 1980. Ensinou na Universidade Ahmadu Belo e na Universidade de Jos, sendo a decana de ciencias naturais nesta última. O seu labor en materia de xeovisualización utilizouse para localizar tanto depósitos minerais como augas subterráneas en Nixeria. Tamén creou un mapa de gravidade de Nixeria,[3] traballando con varias das súas estudantes femininas. Despois de xubilarse, dedicou o seu tempo a unha organización benéfica con sede en Nixeria, CCWA, que fundara en 1991.

Premios

Ajakaiye foi recoñecida tanto polos seus avances científicos como pola súa axuda á nación de Nixeria. A Sociedade de Minería e Xeociencias de Nixeria honrouna polo seu traballo, converténdoa na primeira muller en recibir o premio. Tamén foi a primeira africana negra en ser nomeada membro da Sociedade Xeolóxica de Londres.

Véxase tamén

• Mulleres en Física