Nieuport B.N.1
| Nieuport B.N.1 | |
|---|---|
| Tipo | caza |
| Fabricante | Nieuport & General Aircraft |
| Deseñado por | Henry Folland |
| Primeiro voo | febreiro de 1918 |
| Unidades construídas | 1 |
O Nieuport B.N.1 foi un prototipo británico dun caza monomotor da primeira guerra mundial. Era un biplano deseñado para substituír ao Sopwith Camel, pero só chegou a construírse un exemplar que resultou destruído nun accidente. O Sopwith Snipe construíuse no seu lugar para substituír ao Camel.
Desenvolvemento e deseño[editar | editar a fonte]
En 1917, como resultado dunha Investigación oficial (o Informe Burbidge) nas actividades da Royal Aircraft Factory, o deseño e construción de avións en Farnborough cesaron, e os equipos de deseño da Factory foron divididos.[1] Isto permitiu a Nieuport & General Aircraft Co Ltd, que se formara en Cricklewood, Londres en 1916, para licenciar a produción de avións Nieuport franceses,[2] adquirir os servizos de Henry Folland, responsable anteriormente do deseño do caza S.E.5, como deseñador xefe.[1] O seu primeiro deseño para Nieuport & General foi outro caza, destinado a cumprir coa especificación A.1.A da Air Board para un substituto do Sopwith Camel, en competencia cos deseños presentados por Sopwith (o Sopwith Snipe), Austin Motors (o Austin Osprey) e Boulton & Paul (o Bobolink).[3]
Esta aeronave, designada Nieuport B.N.1 (por "British Nieuport"), era un biplano tractor monomotor dun só asento e construción de madeira. Tiña dúas ás de dous tramos sen graduar e de igual envergadura, unha fuselaxe cos laterais rectos e estaba impulsado por un motor rotativo Bentley BR2 de 230 CV. Un trazo distintivo era unha aleta ventral, como a que usaba S.E.5 (que se convertería nunha marca distintiva de moitos dos deseños de Folland). O armamento era o par normal de metralladoras Vickers sincronizadas xunto cun canón Lewis montado na á superior, disparando sobre a hélice.[4]
Pedíronse tres B.N.1, voando o primeiro deles en febreiro de 1918. Cando foi avaliado, demostrou un rendemento xeral superior ao do Snipe, cun moito mellor teito. Porén, o aparello quedou destruído o 10 de marzo de 1918 cando o seu motor (só o sexto BR2 fabricado) incendiouse no aire. Isto fixo que o B.N.1 fose abandonado, sendo mercado o Snipe como substituto do Camel, e Folland concentrándose no deseño do máis avanzado Nieuport Nighthawk.[5]
Notas[editar | editar a fonte]
Bibliografía[editar | editar a fonte]
- Bruce, J.M. British Aeroplanes 1914-18. Londres: Putnam, 1957.
- Bruce, J.M. War Planes of the First World War: Volume One:Fighters. Londres: Macdonald, 1965.
- Mason, Francis K. The British Fighter since 1912. Annapolis, USA: Naval Institute Press, 1992. ISBN 978-1557500823.
- "New Companies Registered". Flight, 16 de novembro de 1916. p. 1016.