Wikipedia:Proxectos pedagóxicos/Profesorado/Competencias curriculares

Comezo

Profesorado

Alumnado

Conversas

Recursos

Competencias curriculares

As competencias básicas na lexislación educativa
Segundo a Recomendación 2006/962/EC, do 18 de decembro de 2006, do Parlamento Europeo e do Consello, sobre as competencias clave para a aprendizaxe permanente, defínense as competencias como "unha combinación de coñecementos, capacidades, ou destrezas, e actitudes adecuadas ao contexto", e considérase que “as competencias clave son aquelas que todas as persoas precisan para a súa realización e o seu desenvolvemento persoal, así como para a cidadanía activa, a inclusión social e o emprego”. Unha competencia supón a combinación de habilidades prácticas, coñecementos, motivación, valores éticos, actitudes, emocións e outros compoñentes sociais e de comportamento que se mobilizan conxuntamente para lograr unha acción eficaz. Xa que logo, as competencias considéranse como coñecemento na práctica, un coñecemento adquirido a través da participación activa en prácticas sociais que, como tales, se poden desenvolver tanto no contexto educativo formal, a través do currículo, como nos contextos educativos non formais e informais; conceptualízanse como “un saber facer” que se aplica a unha diversidade de contextos educativos, sociais e profesionais. En España incorporáronse ao sistema educativo non universitario as competencias clave co nome de competencias básicas. A LOE introduce o termo competencias básicas por primeira vez na normativa educativa, mentres que a LOMCE establece un modelo de currículo baseado en competencias. Segundo o DECRETO 86/2015, do 25 de xuño, polo que se establece o currículo da educación secundaria obrigatoria e do bacharelato na Comunidade Autónoma de Galicia, as competencias clave do currículo serán as seguintes:

• Comunicación lingüística
• Competencia matemática e competencias básicas en ciencia e tecnoloxía
• Competencia dixital
• Aprender a aprender
• Competencias sociais e cívicas
• Sentido de iniciativa e espírito emprendedor
• Conciencia e expresións culturais

Competencias curriculales adquiridas ó traballar na Galipedia
A aprendizaxe baseada en competencias caracterízase por:

• A súa transversalidade
• O seu dinamismo
• O seu carácter integral

O proceso de ensino e aprendizaxe competencial débese abordar desde todas as materias de coñecemento e por parte das diversas instancias que conforman a comunidade educativa, tanto nos ámbitos formais como nos non formais e informais. O seu dinamismo reflíctese en que as competencias non se adquiren nun determinado momento e permanecen inalterables, senón que implican un proceso de desenvolvemento mediante o cal os individuos van adquirindo maiores niveis de desempeño no seu uso. A Galipedia, dado o seu carácter de enciclopedia colaborativa aberta, é unha ferramenta multidisciplinar e dinámica coa que os alumnos poden progresar nas súas habilidades de uso, dende a mera consulta de artigos e a edición tutelada ate a edición avanzada e a participación na toma de decisións, podendo continuar desenvolvendo as súas competencias máis alo do ámbito propiamente educativo. Un enfoque metodolóxico baseado nas competencias clave e nos resultados de aprendizaxe comporta importantes cambios na concepción do proceso de ensino-aprendizaxe, cambios na organización e na cultura escolar; require a estreita colaboración entre os docentes no desenvolvemento curricular e na transmisión de información sobre a aprendizaxe dos alumnos e alumnas, así como cambios nas prácticas de traballo e nos métodos de ensino. A Wikipedia facilita a colaboración entre docentes de diferentes disciplinas ou centros de ensino, e entre docentes e alumnos, por medio das páxinas de discusión, a taberna ou as páxinas de proxectos educativos. A adquisición eficaz das competencias clave por parte do alumnado e a súa contribución ao logro dos obxectivos das etapas educativas, desde un carácter interdisciplinar e transversal, require do deseño de actividades de aprendizaxe integradas que permitan avanzar cara aos resultados de aprendizaxe de máis dunha competencia ao mesmo tempo. Un proxecto pedagóxico pode converterse nunha actividade de aprendizaxe na que se integren diferentes obxectivos, disciplinas, linguas, centros e competencias básicas. A continuación amósanse algunas vantaxes que presenta a Galipedia como ferramenta educativa para acadar as diferentes competencias básicas:

Competencia 1: Comunicación lingüística
A Galipedia é unha enciclopedia dixital que emprega múltiples formatos (texto, son, imaxe, audiovisual) que poden ser consultados ou editados de forma colaborativa polos usuarios. O seu formato é plurilingüe, de modo que un artigo pode ser consultado ou editado en diversas linguas, ou traducido entre elas. A Galipedia non é unha fonte primaria de información, pero precisa de fontes primarias autorizadas e verificables nos seus artigos, polo cal o seu emprego implica a busca desas fontes primarias do saber.

Competencia 2: Competencia matemática e competencias básicas en ciencia e tecnoloxía
A participación do alumnado na edición de artigos científicos e tecnolóxicos require que asuman unha actitude crítica e científica cara a información que deben procesar e presentar. Este traballo contribúe de xeito inequívoco a mellorar non só o seu coñecemento científico, senón tamén a súa capacidade para contrastar, avaliar e seleccionar a información, procedemento inherente ao quefacer científico e tecnolóxico.

Competencia 3: Competencia dixital
A relación da Galipedia coa competencia dixital é evidente. Participar na Galipedia implica coñecer o funcionamento técnico desta e familiarizarse coas linguaxes de etiquetado, a publicación de información en liña, a edición de imaxe dixital ou a arquitectura da propia web.

Competencia 4: Aprender a aprender
Para editar artigos na Galipedia é preciso que o alumnado se enfronte a procesos de análise, selección e síntese de información que, sen dúbida, contribúen a que este desenvolva a súa capacidade para enfrontarse a novas aprendizaxes e retos cognitivos.

Competencia 5: Competencias sociais e cívicas
Un proxecto colaborativo e eminentemente social como a Galipedia baséase en valores de cooperación e participación cívica que deben ser fomentados entre o alumnado. Sentirse partícipes dun proxecto de tal magnitude é un reforzo positivo moi grande, e contribúe a xerar hábitos de responsabilidade, traballo en equipo e proactividade nos rapaces e rapazas.

Competencia 6: Sentido de iniciativa e espírito emprendedor
Participar na Galipedia require do alumnado actitudes de compromiso e responsabilidade, e os achega, de xeito seguro e controlado, ás dinámicas de funcionamento e ás dificultades de xestionar un proxecto real e de gran envergadura. Ademais familiariza ao alumnado co traballo en equipo inherente a esta actividade.

Competencia 7: Conciencia e expresións culturais
Unha enciclopedia é, se cadra, a máxima expresión da vontade de preservación da conciencia cultural dunha sociedade. Desde este punto de vista, que o alumnado participe na redacción dunha enciclopedia global e multicultural como é a Galipedia, favorece que poida asumir actitudes de respecto, valoración e coidado do patrimonio cultural da humanidade.

Notas

↑ Comezo de páxina