Leave Home é o segundo álbum de estudio da banda estadounidense de punk rockRamones, publicado o 10 de xaneiro de 1977 a través do selo Sire Records. As cancións do disco foron escritas inmediatamente despois de rematar de compoñer os temas do seu anterior traballo. O álbum tivo un maior valor de produción que a súa estrea, e conta con tempos máis rápidos. A fotografía da portada foi tomada por Moshe Brakha, e a contraportada, que se convertería no logotipo do grupo, foi deseñada por Arturo Vega. Editáronse tres sinxelos do álbum, pero só un deles chegou a entrar nas listas. O disco tamén foi promocionado con varias xiras nos Estados Unidos e Europa.
As cancións de Leave Home concéntranse en varios temas, sendo o estilo musical tamén diverso. Algunhas cancións están máis orientadas cara ao pop, mentres que outras, como "Gimme Gimme Shock Treatment" e "Pinhead", están cheas de guitarras distorsionadas e teñen unha sonoridade máis punk rock. A canción "Carbona Not Glue" foi quitada do álbum debido a que potencialmente violaba a marca rexistrada do quitamanchas Carbona. O tema foi substituído por "Babysitter" no Reino Unido e por "Sheena Is a Punk Rocker" nos Estados Unidos (antes de incluílo en Rocket to Russia); tanto "Carbona" como
"Babysitter" aparecen na edición expandida de 2001.[1]
A recepción da crítica foi en xeral favorable, con varios críticos sinalando que se asemellaba demasiado ao seu álbum de estrea. Os críticos tamén dixeron que o traballo era menos innovador que a súa estrea, pero tiña pezas humorísticas e amenas. O disco só chegou ao número 148 da lista Billboard 200 a pesar da aclamación da crítica e de que os membros da banda agardaban un maior éxito comercial.
