Jesús Silva Méndez
| Biografía | |
|---|---|
| Nacemento | 1933  Ourense, España |
| Morte | 2 de setembro de 2011 (77/78 anos) Ourense, España |
| Causa da morte | derramo cerrebral |
| Outros nomes | Padre Silva |
| Relixión | Igrexa católica |
| Actividade | |
| Ocupación | circus director (en)  , sacerdote católico |
| Orde relixiosa | Compañía de Xesús |
| Obra | |
Obras destacables
| |
| Premios | |
Jesús César Silva Méndez, coñecido como o Padre Silva, nado en Ourense en 1933 e finado na mesma cidade o 2 de setembro de 2011, foi un sacerdote católico galego, fundador e director de Benposta Nación de Muchachos, no lugar de Benposta, na parroquia ourensá de Seixalbo.
Traxectoria
[editar | editar a fonte]Jesús Silva é coñecido polo seu labor de dirección do Benposta Nación de Muchachos. Esta entidade educativa desempeñou o seu traballo entre a mocidade de substratos sociais desfavorecidos, en particular entre a afectada pola pobreza ou a violencia. O paso por Benposta de rapazada estranxeira posibilitou a fundación de filiais noutros países, como Portugal, Venezuela e Colombia.
O Padre Silva recibiu o premio Rafael Bárez concedido pola Asociación Xustiza e Sociedade de Galiza, en recoñecemento ao seu traballo. En tres ocasións foi proposto por países como Israel ou Xapón para o Premio Nobel da Paz[1].
Obra
[editar | editar a fonte]Benposta Nación de Muchachos veu funcionando dende 1957 na súa sede ourensá. Tiña entre os seus obxectivos o desenvolvemento do ensino, a investigación a cultura, a educación, as artes e as ciencias, así como a asistencia na educación, os dereitos, a cultura, a investigación e o desenvolvemento integral da infancia, a adolescencia e a mocidade no ámbito nacional e internacional. Unha serie de desencontros coa administración autonómica, alén dos seus propios problemas financeiros, forzaron o seu peche no ano 2003.
A idea fundamental das escolas de Benposta era promover o desenvolvemento físico e espiritual, mais sen unha orientación relixiosa definida. Como parte da súa educación, as nenas e os nenos participaban nas tarefas de mantemento e xestión do complexo escolar. Empregaban métodos pedagóxicos próximos aos das Escolas democráticas, nas que defendían a participación libre da rapazada nos procesos de toma de decisións. As escolas de Benposta Nación de Muchachos contaban cunha alcaldía, un parlamento e mesmo unha moeda propia.
Benposta Ourense contou durante anos cunha emisora de televisión local, a Ourense Televisión Benposta. Alén diso, foi coñecida por manter dende 1963 unha escola de artes acrobáticas e circenses, a segunda de Europa trala escola do circo de Moscova, na que participaba rapazada de todas a idades. Nesta escola formábanse as rapazas e rapaces que formaban parte do coñecido como Circo de los Muchachos.
En febreiro de 2019, a Asociación Cultural Padre Silva (creada trala morte deste en 2011) abriu as portas do Museo Circo de los Muchachos, situado na zona vella da cidade de Ourense, no número 6 da rúa Bailén. Este museo conta cunha exposición que recolle a evolución histórica da Benposta ourensá.[2][3][4]
Notas
[editar | editar a fonte]- ↑ "La Ciudad de los Muchachos fue un país dentro de un país", entrevista en Diario de Navarra, 25 de abril de 2009 (consultado o 15 de febreiro de 2010) (en castelán).
- ↑ "A Asociación Cultural Padre Silva promove o novo espazo dedicado á memoria desta experiencia". culturagalega.org. 4 de febreiro de 2019. Consultado o 4 de febreiro de 2019.
- ↑ "El museo de los Muchachos, un paso para recuperar Benposta". La Región (en castelán). 4 de febreiro de 2019.
- ↑ Rey, Javier (4 de febreiro de 2019). "Un museo para guardar el alma del Circo de los Muchachos y Benposta". La Región (en castelán).