Historia de Handan

Na Galipedia, a Wikipedia en galego.
Saltar ata a navegación Saltar á busca

Pola súa situación próxima ao berce da dinastía Shang foi lugar de asentamentos dende o segundo milenio antes da nosa era. A primeira mención escrita do lugar aparece no tempo das Primaveras e Outonos (719-476 aC) da dinastía dos Zhou Orientais.

Capital de Zhao[editar | editar a fonte]

Mais a súa entrada na historia data do 386 aC, no período dos Reinos Combatentes, cando o mandatario Jinghou de Zhao traslada a súa capital á zona, construíndo una nova cidade.

Inda en pleno estudo arqueolóxico, semella unha interesante aproximación aos principios dos Ritos de Zhou do urbanismo chinés anterior a Changan. Tratábase dunha cidade dobre [1][2]: A menor (ao suroeste da actual) era a cidade palaciana (Zhaowangcheng). Un complexo amurallado con forma de escuadra de máis de 5km2 dividido a súa vez en tres partes. Na occidental unha gran plataforma de 265x285m e 19m de altura contiña o pazo ou castelo (Longtai [3]). Outras plataformas aparecen na parte oriental así coma ruínas de templos [4]. A disposición respectaba unha simetría axial.

A cidade comercial e residencial (Dabei) situábase baixo a moderna. De forma rectangular irregular e 4,8x3,2 km tamén dispuña doutra plataforma de 26m de altura (Congtai, hoxe parque central de Handan) que seica servía para contemplar as paradas de tropas, danzas e outras celebracións. O conxunto de ámbalas dúas cidades albergou a rica actividade económica cultural e política da capital durante 159 anos ata a súa conquista polo reino Qin no 228 aC. Pero durante toda a dinastía Han (206aC-220dC), Handan continuou a seres unha das maiores cidades do imperio, centro de artesanía, comercio, fundición de ferro e fabricación de metais (13,6 km2 e 150.000h).

Lento declinar[editar | editar a fonte]

Foi despois, coa época turbulenta cando o colapso dos Han, que Handan comezou a declinares converténdose aos poucos nunha mera cidade de provincias pechada no recinto da vella cidade comercial Zhao [5][6], ata que, trala Segunda Guerra Mundial, o réxime comunista chinés impulsou unha forte industrialización apoiada nos grandes xacementos de carbón da rexión.

Notas[editar | editar a fonte]

  1. Traza da cidade dobre, capital de Zhao
  2. Idem co detalle da articulación tripla da cidade palaciana
  3. A plataforma do pazo ou Longtai
  4. [1][Ligazón morta]
  5. Esquema coa cidade moderna sobor da vella
  6. Mapa de Handan nas décadas pasadas[Ligazón morta]