Batedor
Un batedor eléctrico é un electrodoméstico de cociña que permite moer ingredientes no mesmo recipiente no que se preparan. Pódese utilizar para facer diferentes tipos de purés, mollos e sopas. É a evolución do batedor de globo ou manual.
Descrición[editar | editar a fonte]
O batedor eléctrico foi inventado en Suíza por Roger Perrinjaquet, quen patentou a idea en 1950 e chamou á súa creación bamix, unha contracción de "bat et mixe" (bate e mestura). O 24 de abril de 1955 presentouse por vez primeira o novo batedor Bamix na Feira de Hannover.
Mais a versión máis popular foi a inventada polo enxeñeiro Gabriel Lluelles (Barcelona, 1923) para a empresa española Pimer (acrónimo de Pequenas Industrias Mecánico Eléctricas Reunidas[1]), e que foi chamada de Minipimer, comercializada en 1959. A empresa foi posteriormente comprada pola alemá Braun GmbH, que mantivo o nome orixinal do aparello, que se converteu no nome común deste tipo de batedor.[2]
Diferénciase dos batedores de vaso e dos robots de cociña en que non require que os alimentos sexan colocados nun recipiente especial para procesalos. Á súa vez, diferénciase do batedor mesturador (manual ou eléctrico) en que este último non tritura os ingredientes e dos liquidificadores en que estes teñen as fibras dos ingredientes na cesta centrífuga separándoas da parte líquida.
Contén o motor, prolongado por un accesorio no que se aloxan as coitelas dispostas en cruz. O accesorio triturador/mesturador pode ser de plástico ou de metal, e en moitos modelos pódese desmontar para limpalo sen risco de mollar o motor. Úsase mergullando as coitelas na preparación que se quere mesturar ou triturar e algúns modelos poden empregarse directamente nas tixolas, potas e olas, mentres están no lume. Poden dispor de 15 velocidades e accesorios para montar nata, a xeito do batedor mesturador.
Como curiosidade en portugués recibe o nome de varinha mágica. En castelán de España coñécese como batidora de brazo, mais en Latinoamérica coma Licuadora de brazo.
Notas[editar | editar a fonte]
- ↑ "Phylosoft.com". Arquivado dende o orixinal o 25 de xuño de 2012. Consultado o 17 de febreiro de 2014.
- ↑ Larga vida a la minipimer. Artigo no xornal El País, 21 de xaneiro de 2008
Véxase tamén[editar | editar a fonte]
Outros artigos[editar | editar a fonte]
Ligazóns externas[editar | editar a fonte]
- Batedor eléctrico (en castelán)
- A Whirling Dervish That Dips Right Into Your Pot, por Amanda Hesser. New York Times, 19 de agosto de 1998 (en inglés).
