Sufraxio indirecto
Denomínase sufraxio indirecto ou elección indirecta aquel no que os votantes elixen a uns representantes que, á súa vez, deben constituír un corpo electoral, chamado Colexio electoral, para elixir o cargo público correspondente.
O modelo de elección indirecta aplícase indistintamente nos países democráticos. A súa aplicación práctica obsérvase case sempre na elección do Primeiro Ministro ou Presidente do Goberno e, en xeral, do titular do poder executivo. Neste caso os cidadáns elixen aos membros da Asemblea ou Parlamento e é este órgano o que elixe ao xefe do poder executivo. De igual xeito acontece nalgúns sistemas republicanos democráticos nos que o Xefe do Estado non é elixido directamente polos cidadáns, senón que estes elixen primeiro uns representantes que constitúen os verdadeiros electores. Este é o caso do Presidente dos Estados Unidos.
Por extensión, o termo sufraxio indirecto aplícase a todos os procesos electorais, sexan ou non políticos nos que se elixe por graos aos representantes. Así poderán ser de segundo grao, terceiro grao etc, segundo o número de corpos de electores que sexa preciso elixir para determinar o resultado final.
