Loteria de Catalunya

Loteria de Catalunya (Lotaría de Cataluña), coñecida ata 2007 como Loto Catalunya, é o ente responsable dos xogos de azar establecidos na comunidade autónoma de Cataluña e que está regulado pola Entidade Autónoma de Xogos e Apostas, dependente da Generalitat de Cataluña. Os ingresos da recadación destínanse ao financiamento de servizos sociais.

Historia

A lotaría de Cataluña comezou a funcionar baixo o nome Loto Catalunya o 27 de abril de 1987, coa posta á venda dun sistema de lotaría rápida baseado nun "resga e gaña" chamado Loto Ràpid. A primeira serie constaba de 30 millóns de boletos e aseguraba 1350 millóns de pesetas (aprox. 8,1 millóns de euros) en premios. O 15 de outubro de 1987 saíu un novo sorteo chamado Lotto 6/49, realizado os mércores e os sábados. Co paso do tempo Loto Catalunya lanzou outros sorteos como Trio (1988), Super 10 (1990), Loto Express (1993) ou Supertoc (1994).

En 2013 anunciouse o lanzamento dun sorteo extraordinario para o 31 de decembro, coñecido como La Grossa de Cap d'Any (O Gordo de fin de ano). O 70% do recadado destinarase a premios, mentres que o 30% restante irá a fins sociais. Chegouse mesmo a especular coa ampliación do sorteo a outras datas sinaladas como Sant Jordi (23 de abril), San Xoán (23 de xuño) ou a Diada (11 de setembro), pero finalmente descartouse.

A venda de lotaría catalá realízase a través dunha rede de máis de 2.000 establecementos autorizados que se encontran en máis de 400 municipios de toda a comunidade tales como estancos, quioscos ou bares. Os premios repartidos por Loteria de Catalunya non tributan no IRPF.

Xogos

• Loto Ràpid: sistema de lotaría rápida baseado nun "resga e gaña" que comezou a funcionar en 1987. Posúe múltiples sistemas de xogo e series que reparten premios de 1 a 50.000 euros segundo o tipo de xogo. Actualmente Lotaría de Catalunya cobre 14 sistemas de "resga e gaña", todos eles cunha mecánica, prezos e premios diferenciada.
• Lotto 6/49: sistema de lotaría similar a outros presentes en España como a Bono Loto. O xogador debe seleccionar 6 números entre o 1 e o 49, cunha combinación gañadora de 6 números máis o complementario, e un reintegro que leva imprimido un número do 0 ao 9 asignado de forma aleatoria. Existe a posibilidade de realizar sorteos consecutivos. Dende o ano 2002 engadiuse o Jòquer, que asigna un número de 6 cifras por billete e se paga á parte. Os sorteos de ambos os dous realízanse o mércores e sábado de cada semana.
• Trio: sistema de lotaría no que se deben escoller 3 números entre o 0 e o 9. O vencedor é un número de 3 cifras que, colocadas na orde de saída, definen os diferentes premios. Inclúe unha modalidade chamada Supertrio que permite gañar o triplo do premio se se paga o dobre. Existe a posibilidade de realizar sorteos consecutivos e celébranse todos os días. Pode haber tamén parte de premio por varias combinacións como o último número, o primeiro e último, os dous últimos ou os dous primeiros.
• Super 10: sistema de lotaría no que o xogador escolle 10 números entre o 1 e o 68. a combinación gañadora está formada por 20 números que diferencian as categorías de premios. Tamén se pode xogar a Diana, un sistema no que, entre os números da combinación gañadora se realiza un segundo sorteo para escoller o número de Diana. Se se acerta, ademais do premio de Super 10 gáñase o correspondente a Diana. Celébrase todos os días.
• Loto Express: lotaría expresa na que o xogador debe escoller entre 4 e 10 números dun total de 70. A combinación gañadora está formada por 20 números que definen as categorías de premios e tamén se establece o sistema Diana. O seguimento do sorteo faise mediante monitores específicos que están instalados en 800 puntos de venda e se o xogador non acerta ningún número gaña o importe xogado.
• Supertoc: modalidade presente no bingo. O xogador adquire na sala de bingo un billete con 15 números diferentes comprendidos entre o 1 e o 90, e deberá conseguir completalo coa secuencia de números do sorteo antes que ningún outro participante.
• La Grossa de Cap d'Any: sistema de lotaría pasiva que pretende emular o sorteo do Gordo de Nadal de Loterías y Apuestas del Estado. A súa primeira edición celebrouse o 31 de decembro de 2013, ofrecendo tres premios. Os décimos teñen un prezo de 5 euros e os gañadores do primeiro premio obteñen 20.000 euros por euro xogado.

Véxase tamén

Ligazóns externas

• Loteria de Catalunya (en catalán)