Kokkeibon

Páxina de Otsuriki (1810), de Jippensha Ikku.

O kokkeibon (xaponés: 滑稽本, lit. "libro cómico") foi un xénero literario e un tipo de novela do Xapón premoderno. Destaca pola súa representación dos comportamentos cómicos da xente común.

Historia

O kokkeibon descende dun xénero anterior, o dangibon. Apareceu no século XIX, durante o remate do período Edo (1603-1868). A súa primeira obra representativa é Tōkaidōchū Hizakurige 東海道中膝栗毛 ("Viaxes entre Toquio e Quioto", 1802-1822), de Jippensha Ikku (1765-1831).

O xénero alcanzou o seu auxe entre 1804 e 1830. Os seus autores máis destacados son Jippensha Ikku e mais Shikitei Sanba (1776-1822). Deste último, destaca Ukiyoburo 浮世風呂 ("Os baños do mundo flotante", 1809-1813).

Características

O kokkeibon adoita representar o humor propio da xente común, mediante diálogos entre as personaxes. Os libros inclúen ilustracións.

Véxase tamén

Bibliografía

• Tanahashi, Masahiro (2015). "The birth of kokkeibon (comic novellas)". En Lurie, David; Shirane, Haruo; Suzuki, Tomi. The Cambridge History of Japanese Literature (en inglés). Cambridge University Press. pp. 523–531. ISBN 9781107029033. 
• VV. AA. (1984). 日本古典文学大辞典 第2巻 ("Gran dicionario de literatura clásica xaponesa, vol. 2") (en xaponés). Iwanami Shoten. ISBN 9784000800624.